Машҳур британиялик журналист ва телебошловчи Пирс Морган Криштиану Роналду билан ўтказган интервюси ортидан қайд этилган улкан кўрсаткичлар ҳақида фикр билдирди. Унга кўра, футбол дунёсидаги энг катта юлдузлардан бири билан амалга оширилган суҳбат глобал аудиторияда тенгсиз қизиқиш уйғотган.
Морганнинг таъкидлашича, 40 ёшли португалиялик суперюлдуз билан бўлган эксклюзив интервю барча платформаларда жами 165 миллион марта томоша қилинган. Бу — нафақат журналист карьераси, балки рақамли медиамакон учун ҳам жуда катта натижа сифатида қайд этилмоқда.
“Чиндан ҳам ҳайратланарли рақамлар… Криштиану, бундай юракдан чиққан интервю ва ижтимоий тармоқлардаги ҳамкорлик учун миннатдорман. Кўриб турибмизки, бу ҳақиқий ғалаба, ҳақиқий улкан муваффақият!”, — дея ёзди Морган ўзининг X ижтимоий тармоғидаги саҳифасида.
Интервюнинг оммавий сабабларидан бири — Роналду ёшлик давридан бошлаб қилиб келаётган ўйинлар, шахсий фикрлари ва спортдаги келажагига оид жавоблари очиқ ва самимий бўлгани. Шунингдек, у суҳбат давомида 2026 йилги жаҳон чемпионати унинг футбол карьерасидаги сўнгги мундиал бўлишини тилга олгани ҳам катта резонанс келтирди. Бу эса миллионлаб мухлислар учун Роналду эпохасининг якунланишига доир қайғули, шу билан бирга муҳим хабар сифатида қабул қилинди.
Интервю видеоларининг бундай кенг тарқалиши футболчиларнинг шахсий фикрлари, инсоний қиёфаси ва очиқ мулоқотга тайёрлиги жамоатчилик учун қанчалик муҳим эканини яна бир бор кўрсатиб берди. Пирс Морган эса ўз навбатида, дунёдаги энг машҳур футболчи билан амалга оширилган суҳбат орқали журналистикадаги ўрнини янада мустаҳкамлагани шубҳасиз.
Шу билан, мазкур суҳбат нафақат оммавий кўрсаткичлар, балки муҳокамалар, мақолалар ва миллионлаб реакциялар туфайли ҳам футбол тарихи саҳифаларида алоҳида урин эгаллаб улгурди. Роналду эса яна бир бор глобал спорт саҳнасининг энг катта магнити эканини исботлади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
