«Al Ain Cup» мусобақасида бугун яна бир тарихий беллашув қайд этилди. Ўзбекистон миллий жамоаси Миср каби тажрибали ва юқори даражадаги рақибга қарши майдонга тушиб, муносиб ўйин орқали ишончли ғалабага эришди. Итальян мутахассиси Фабио Каннаваро шогирдлари бу муваффақият билан нафақат финалга йўлланма олди, балки Миср термаси учун анча вақт давом этган мағлубиятсиз серияга нуқта қўйди.
Маълумки, Ҳоссам Ҳасан бошчилигидаги Миср миллий жамоаси охирги 8 ой мобайнида бирорта ўйинни йўқотмаган эди. Уларнинг сўнгги мағлубияти 27 март куни Хорватияга қарши ўтказилган ўртоқлик учрашувида (2:4) қайд этилган. Шундан кейинги 14 та беллашув давомида Салоҳ етакчилигидаги терма 10 марта ғалаба қозонган, фақат 4 марта дуранг қайд этганди.
Бироқ бугун барчаси ўзгарди. Ўзбекистон миллий жамоаси жанг майдонида ўзининг жисмоний тайёрлиги, тактик интизоми ва иродаси билан ажралиб тура олди. Айниқса, ўйин бошидаёқ босимни оширган термамиз рақибни қийин аҳволга солди ва муҳим голлар орқали ҳисобда олдинга чиқди. Мисрнинг тажрибаси, кучли таркиби ва йирик турнирлар тажрибасига қарамай, улар бу сафар ўйинни ўз фойдаларига ўзгартиришга қодир бўлишмади.
Албатта, Мисрнинг бу мағлубияти уларнинг йил давомидаги барқарор ўйинини инкор этмайди. Улар Жаҳон чемпионати–2026 мусобақасига муносиб равишда йўллама олган ва Африка қитъасининг етакчи жамоалари қаторида ҳисобланади. Аммо бугун барча диққат Ўзбекистонга қаратилди — жамоа ўз сўзини айта олишини яна бир бор намойиш этди.
Энди Каннаваро шогирдлари финалда Эронга қарши баҳс олиб боради. Миср эса 3-ўрин учун Кабо-Вердега қарши куч синашади.
Ўзбекистоннинг бу ғалабаси мухлисларга янги умид, жамоага эса янги ишонч бағишлади. Ишонамизки, бу ғалабадан кейин миллий жамоамиз янада юқори марраларни кўзлайди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
