2026 йилги жаҳон чемпионати саралаши доирасида Африка қитъасидаги энг кескин паллалардан бири — гуруҳ босқичида иккинчи ўринни эгаллаган жамоалар учун ташкил этилган плей-офф баҳслари ниҳоясига етди. Футбол мухлислари катта қизиқиш билан кутган ҳал қилувчи финал учрашуви эса ҳақиқий драмани тақдим этди.
Конго ДР — Нигерияга қарши тарихи бой баҳс
Нигерия ва Конго Демократик Республикаси ўртасидаги финал нафақат плей-оффнинг, балки бутун Африка саралаш босқичининг энг катта интригаларидан бирига айланди. Учрашув асосий вақтда 1:1 ҳисобида якунланди.
3-дақиқада Ониека Нигерияни ҳисобда олдинга олиб чиқди. Бироқ Конго ДР тезда руҳий барқарорлигини тиклаб, 32-дақиқада Мешакнинг голи эвазига ҳисобни тенглаштирди.
120 дақиқалик жанг ҳам ғолибни аниқламади ва барчаси пенальтилар сериясига қолди. У ерда Конго ДР аъзолари совуққонлик билан ҳаракат қилиб, 4:3 ҳисобида зафар қучди ва сўнгги босқичга йўл билан таъминлади.
Нигерия — юлдузларга тўла жамоа мундиалсиз қолди
Осимҳен, Лукман, Чуквуэзе каби топ-ўйинчиларга эга бўлган Нигерия термасининг бундай натижа қайд этиши бутун қитъада катта ҳайрат уйғотди. Африкадаги энг кучли жамоалардан бири деб ҳисобланган “Супер орлс” навбатдаги жаҳон чемпионатини телевизор орқали кузатишга мажбур бўлади.
Конго ДР учун тарихий имконият
Конго Демократик Республикаси эса янги босқич остонасида. Улар энди қитъалараро плей-оффда бошқа қитъа вакили билан муҳим ўйин ўтказади. Рақиб қуръа орқали аниқланади.
Агар Конго ДР бу босқичдан ҳам муваффақиятли ўтса, 1974 йилдан бери илк марта жаҳон чемпионатида иштирок этади — бу эса мамлакат футбол тарихидаги энг ёрқин воқеалардан бирига айланиши мумкин.
Камерундан кейин — Нигерия ҳам тиз чўкди
Эслатиб ўтамиз, Конго ДР финалгача бўлган йўлда Африка футболидаги гигантлардан бири — Камерунни мусобақадан четлатганди. Улар ўзларининг қайсар ўйини, жисмоний тайёргарлиги ва руҳий барқарорлиги билан ҳақли равишда плей-оффнинг энг кучли жамоаларидан бири сифатида тан олинмоқда.
Учрашув протоколи
Нигерия — Конго ДР 1:1 (Пенальтилар: 3:4)
Голлар: Ониека (3) — Мешак (32)
Нигерия таркиби:
Нвабали, Фредрик, Ажайи, Бэсси, Зайду (Ониэмачи 96), Ониека, Ндиди, Ивоби (Арокодаре 77, Авазием 115), Чуквуэзе (Симон 57), Лукман (Эжуке 57), Осимҳен (Адамс 46)
Конго ДР таркиби:
Мпаси-Нзау (Фаюлу 120), Туанзебе, Ван-Биссака, Мбемба, Масуаку, Мукау (Кайембе 71), Мутуссами, Садики, Мешак (Сипенга 71), Мбукю (Баликвиша 105), Бакамбу (Майеле 59)
Қитъалараро плей-оффда Конго ДРга омад тилаймиз. Африкадаги сенсациялар ҳали якунланмади, демак, олдинда янада қизғин ўйинлар кутмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
