2026 йилги футбол бўйича Жаҳон чемпионатига қизиқиш ортиб бораётган бир пайтда, АҚШ президенти Доналд Трамп мухлислар учун муҳим янгиликни маълум қилди. Унга кўра, АҚШ элчихоналари мундиал чипталарини харид қилган мухлисларга виза суҳбатини тезлаштирилган тарзда белгилаб беради. Бу қарор дунё бўйлаб саёҳатни режалаштирган футбол ишқибозлари учун катта қулайлик яратади.
Трампнинг баёнотидан сўнг, давлат котиби Марко Рубио вазиятга ойдинлик киритди: чиптага эга бўлган шахслар виза аризасини топширганидан кейин тахминан 6–8 ҳафта ичида суҳбатга чақирилиши мумкин. Бу одатдагидан анча қисқа муддат бўлиб, виза олиш жараёнини сезиларли енгиллаштиради.
“Чипта — виза эмас”
Шунга қарамай, Рубио муҳими бир нарсани таъкидлаб ўтди: чиптага эгалик АҚШга киришга кафолат эмас. Ҳар бир ариза бир хил тартибда, умумий хавфсизлик қоидалари асосида текширилади.
Унинг айтишича, чиптаси бор мухлисларга фақат навбат масаласида устуворлик берилади, холос. “Бизнинг фарқимиз — уларнинг навбатини тезлатамиз. Лекин барча текширувлар барибир умумий қоидаларга мувофиқ амалга оширилади”, деди Рубио.
2026 йилги Жаҳон чемпионати — АҚШ учун улкан чора-тот
Мундиал 2026 йил июн–июл ойларида АҚШ, Мексика ва Канада стадионларида ўтказилади. Энг кўп ўйинлар Қўшма Штатларда ташкил этилиши кутилмоқда. Мазкур мусобақа тарихдаги энг йирик чемпионатлардан бирига айланиши мумкин.
ФИФА президенти Жанни Инфантино ҳам Оқ уйдаги матбуот анжуманидан сўнг фикр билдирди. Унинг айтишича, келаси мундиални жонли томоша қилиш учун АҚШга 10 миллионгача турист ташриф буюриши мумкин. Бу рақам бундан аввалги чемпионатлардан бир неча баробар юқори, демак, инфратузилма ва виза олиш жараёнини енгиллаштириш эҳтиёжи ҳам табиий.
Мухлислар учун янги имкониятлар
Янгиланган тартиб дунё бўйлаб футбол ишқибозларига сафарни режалаштиришда катта енгиллик беради. Айниқса, АҚШ визаси одатдагидай узоқ вақт талаб қилар экан, чипта эгалари учун 6–8 ҳафталик тезкор суҳбат имкони катта афзаллик сифатида баҳоланяпти.
Шу билан бирга, ҳар қандай ҳолатда чипта визани кафолатламаслиги, текширувлар қатъий тартибда давом этиши эслатилмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
