Қаршининг «Насаф» клуби 2026 йилги мавсумни кучли таркиб билан қарши олиш ниятида селекция ишларини анча эрта бошлаб юборди. Жамоа раҳбарияти янги йилда рақобатбардош қўшилмалар қилишни мақсад қилиб, таркибда жиддий ўзгаришлар амалга оширишга тайёрланмоқда.
Айни пайтда маълум бўлишича, клуб қатор тажрибали ўйинчилар билан хайрлашишни режалаштиряпти. Драган Черан бошчилигидаги бир нечта легионерлар жамоани тарк этиши кутилмоқда. Улар ўрнини эса янги номзодлар билан тўлдириш бўйича музокаралар бошланган.
Энг қизиғи – «Насаф» Самарқанднинг «Динамо» клубидан икки етакчи ўйинчига кўз тиккан. Гап Анваржон Ҳожимирзаев ва Ратинио ҳақида кетмоқда.
Ҳожимирзаев Про Лигадаги фаолиятидан кейин икки мавсум мобайнида «Динамо»нинг асосий юзига айланди ва жамоанинг кўплаб муҳим ўйинларида ҳал қилувчи роль ўйнади. Ратинио эса Бразилия қуйи лигасига оид тажрибасига қарамай, Вадим Абрамов қўли остида Суперлиганинг энг ишончли таянч яримҳимоячилари қаторидан жой олди. Ҳар икки футболчи ҳам ўтган мавсум ПФЛ томонидан Суперлиганинг йил рамзий жамоасига киритилган эди.
Уларнинг «Динамо» билан амалдаги шартномалари 2025 йилнинг якунига қадар амал қилади. Демак, мавсум тугагач, улар эркин агентга айланади ва «Насаф» уларни бепул равишда ўз сафига қўшиб олиш имконига эга бўлади.
Қарши клубининг бу ҳаракатлари жамоа янги мавсумда фақат юқори марралар учун курашиш ниятини очиқ белгилаб турибди. Мухлислар эса «аждарлар» таркибида қандай янгиланишлар бўлишини қизиқиш билан кутмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
