«Барселона» клуби президенти Жоан Лапорта жамоанинг собиқ устози Хави Эрнандеснинг лавозимидан озод этилишига олиб келган мураккаб жараён сабабларини очиқлади. Клуб раҳбарининг сўзларига кўра, мураббийнинг зиддиятли баёнотлари унинг якуний қарорига таъсир қилган.
Ишонч ва икки йил
Лапортанинг айтишича, дастлаб Хави мавсум якунида клубдан кетишини эълон қилган. Бироқ орадан кўп ўтмай, у президент билан учрашиб, вазиятни қайта кўриб чиқишни илтимос қилган. Асосий муаммо айнан шундан кейин бошланган.
«Мен ундан: «Жамоага ишончинг комилми?» деб сўрадим. У: «100 фоиз ишонаман, бу футболчилар билан зафар қучамиз», — деб жавоб берди. Аммо орадан атиги бир ҳафта ўтгач, менга кучли таркибни шакллантириш учун яна икки йил кераклигини эшитдим. Шу пайтда ўзимга: «Аслида нималар юз бермоқда?» деган саволни бердим», — дея Лапортанинг сўзларини келтиради BarcaTimes.
Трансфер талаблари
Президентнинг қўшимча қилишича, бундан сўнг Хави клубнинг спорт директори Деку билан алоқага чиқиб, жамоага шошилинч янги трансферлар зарурлигини ва айрим футболчилар бўйича қўшимча маълумот олишни талаб қилган. Бу эса унинг аввалги "100 фоиз ишонаман" деган сўзларига зид эди.
Якуний қарор
Жоан Лапорта собиқ мураббийга бўлган эҳтироми юқори эканини қайд этди. Бироқ мураббий томонидан берилган бундай қарама-қарши ва доимий ўзгарувчан фикрлар клуб раҳбари учун бошқарув қарорини чиқаришни жуда қийинлаштирган ва натижада жамоа устозини ўзгартириш зарурати туғилган.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
