Украина руҳиятидан олинган сабоқ
Украинанинг “Шахтёр” клуби бош мураббийи Арда Турон Конференциялар Лигаси доирасида Ирландияда “Шэмрок Роверс”га қарши кечган (2:1 ҳисобидаги ғалаба) учрашувдан сўнг ўз фикрларини баён этди. Туркиялик тажрибали мутахассис жамоа Дублинга етиб олиш учун сафарга кўп вақт сарфлаганини, 16 соатлик йўлдан сўнг тўлақонли машғулот ўтказишнинг имкони йўқ бўлганини айтди.
Арда Турон энг катта сабоқни украиналиклардан олганини яширмади. “Мен ҳамма нарсага ижобий баҳо беришга ҳаракат қиламан. Буни кимдан ўрганганимни айтайми? Украиналиклардан. Мен у ерга бораман, бомбалар ёғилади, улар эса хотиржамлик билан: «Бу шунчаки ракета», дейишади. Улар учун дрон муаммо эмас. Уларни жуда ҳурмат қиламан”, — деди мураббий, украиналикларнинг оғир дамларда ижобий муносабатда бўлиш руҳини таъкидлаб.
Лидерларга кескин мурожаат
Шунингдек, Турон жаҳон лидерларига — Трамп, Путин, Эрдўған, Зеленскийга кескин мурожаат қилди: “Ҳозир урушнинг вақти эмас. Болалар уруш ҳақида эмас, Марс ёки бошқа нарсалар ҳақида ўйлаши керак эди. Агар Киевда лоақал бир тунни ўтказсангиз, шундагина футбол ҳақида гапира оласиз”. У украиналикларни яхши кўришини, уларни оиласидек бўлиб қолганини ҳис қилишини қўшимча қилди.
38 ёшли Арда Турон 2025 йил май ойидан бери «Шахтёр» клубини бошқармоқда. Ҳозирда “Шахтёр” Конференциялар Лигасида 9 очко билан пешқадамлик қилмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
