Файзуллаев ва Шомуродовнинг ҳал қилувчи ўйини
Туркия Суперлигасининг сўнгги тури ўзбек футболи учун яна бир ёрқин саҳифа бўлди. Миллий термамиз етакчилари Элдор Шомуродов ва Аббосбек Файзуллаев тўп сураётган «Истанбул Башакшеҳир» сафарда «Касимпаша» устидан 3:1 ҳисобида ишончли ғалаба қозонди. Аммо бу ўйиннинг таъсири биргина натижа билан чекланиб қолмади — учрашув бевосита рақиб мураббийининг тақдирига ҳам таъсир кўрсатди.
Ўйин аввалидаёқ кескин ҳаракатлар билан ажралиб турган Аббосбек Файзуллаев жароҳатдан қайтганига қарамай, яна ўзига хос маҳоратни намоён қилди. У биринчи бўлимдаёқ аниқ жарима зарбаси билан ҳисобни очиб, жамоасига руҳий устунлик бахш этди. Унинг зарбаси нафақат гол, балки «Башакшеҳир»нинг ғалаба йўлидаги асосий бурилиш нуқтаси бўлди.
Беллашув сўнгги дақиқаларида рақиб босими ошиб борди. «Истанбул» бир киши кам бўлган вазиятда ҳимояда жуда кўп энергия сарфлаётган эди. Ана шундай оғир пайтда Элдор Шомуродов саҳнага чиқди. У тезкор ҳужумни логик якунига етказиб, жамоасининг учинчи тўпини урди ҳамда рақибни батамом синдирди. Бу гол ўйин ва вазиятнинг барча нуқтасини ўзгартирар даражада таъсирли бўлди.
Бош мураббий Нури Шахин икки ўзбек легионерини алоҳида тақдирлади ва уларнинг ўйинга қўшган улкан ҳиссасини таъкидлади. Аммо бу ёрқин ўйин «Касимпаша» устози Шота Арвеладзе учун охирги баҳс бўлиб чиқди.
Арвеладзенинг беш ойлик фаолияти якунланди
Ўйиндан кейин жамоа раҳбарияти грузиялик мутахассис билан хайрлашишга қарор қилди. Унинг Туркиядаги иккинчи тажрибаси ҳам узоққа чўзилмади: атиги беш ойда 14 учрашув, 3 ғалаба, 4 дуранг, 7 мағлубият — бу натижалар клубни қаноатлантирмади.
Мураббийлар «ўлими» мавсуми
Қолаверса, бу мавсум Туркияда мураббийлар алмашинуви рекорд даражага етди. Чемпионатнинг илк 14 турида 18 та жамоадан 12 таси бош мураббийини алмаштиришга мажбур бўлди. «Касимпаша» эса бу рўйхатга охирги бўлиб қўшилди. Ундан олдинроқ «Газиантеп», «Бешиктош», «Фенербаҳче», «Истанбул Башакшеҳир», «Эюпспор», «Кайсериспор», «Антальяспор», «Генчлербирлиги», «Фотиҳ Карагюмрюк», «Ризеспор», «Коньяспор» каби жамоалар ҳам шундай қарор қабул қилганди.
Ўзбек легионерларининг бу каби муҳим баҳслардаги таъсири ортиб бораётгани, уларнинг Туркиядаги нуфузини янада мустаҳкамлаётгани шубҳасиз. Айниқса, Файзуллаев ва Шомуродовнинг бундай ўйинлари Туркия футболи медиа маконида ҳам кенг муҳокама бўлмоқда.
Мухлислар учун эса хулоса битта: ўзбек футболчилари халқаро ареналарда тобора каттароқ ўрин эгаллаб бормоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
