Ўзбекистон миллий терма жамоаси ҳужумчиси Элдор Шомуродов Италия А Сериясидаги фаолиятидан кейин нима учун Туркия Суперлигасига йўл олгани ва нега айнан «Истанбул Башакшеҳир» вариантини танлаганини изоҳлаб берди. 30 ёшли легионеримизнинг таъкидлашича, бу қарорнинг марказида бир нарса турган — кўпроқ ўйин амалиёти ва ўзини тўлиқ кўрсата оладиган муҳит.
Элдорнинг айтишича, у янги клуб танлашда бошқаларга қараб иккиланмаган, аксинча, аниқ бир мақсад билан ҳаракат қилган.
«Мен “Истанбул Башакшеҳир”ни кўпроқ ўйин амалиётига эга бўлиш учун танлаганман. Мураббийлар штаби ва жамоанинг ўйин услуби менда жуда катта таассурот қолдирди. Ҳозир мен фақат “Истанбул Башакшеҳир” ҳақида ўйлаяпман. Лигадаги бошқа ҳеч бир жамоа вариантини кўриб чиқмадим», — деди футболчи.
Бу сўзлар Шомуродовнинг қарори тасодифий эмаслигини кўрсатади. У учун муҳим жиҳат — ишонч, майдонга тушиш имконияти ва ўзига мос ўйин тартиби. Демак, у “қулай шартнома” излаб эмас, натижа қилиш учун курашадиган жойни топган.
Маълумот ўрнида, Шомуродов ўтган ёзда «Рома»дан «Истанбул Башакшеҳир»га ижара асосида кўчиб ўтган эди. Битим қиймати 3 миллион евро деб баҳоланган, шу билан бирга турк клуби уни кейин тўлиқ сотиб олиш ҳуқуқини ҳам олган.
Энг қизиғи, бу трансфер ҳозирча ўзини тўлиқ оқлаяпти. Элдор Туркия Суперлигасида 18 та ўйин ўтказиб, 13 бор рақиб дарвозасини ишғол қилди ва тўпурарлар пойгасида пешқадам бўлиб турибди. У ҳатто юлдуз ҳужумчи Виктор Осимхенни ҳам ортда қолдирган: нигериялик форвардда ҳозирча 6 та гол бор.
Шу ҳолатнинг ўзи ҳаммасига жавоб: Шомуродов «нега кетдинг?» деган саволга майдонда гол билан жавоб беряпти. Эндиликда мухлислар учун асосий интрига — Элдор шу суръатни сақлаб қоладими ва “Олтин бутса”гача бориб ета оладими. Туркия саҳнасини танлаган легионеримиз ҳозирча бу лигага “келиб-кетган” эмас, балки унинг бош қаҳрамони бўлиб турибди.
“Zamin”ни Telegram'да ўқинг!
