Сўнгги кунларда ошкор қилинган «Эпштейн файллари» бутун дунёда катта шов-шувга сабаб бўлди. Ҳужжатларда француз терма жамоасининг собиқ футболчиси ва «Бавария»нинг экс-юлдузи Франк Риберининг исми тилга олингани футбол оламида ҳам муҳокамаларни кучайтирди. Бу ҳақда euro-football.ru хабар беради.
Вазият ортидан Риберининг манфаатларини ҳимоя қилаётган Карло Альберто Бруза ижтимоий тармоқларда баёнот берди. У тарқалган маълумотларни ёлғон, дея атди.
«Бу фейк! Эртага жаноб Риберининг адвокати сифатида чиқаман ва мижозим ҳамда унинг оиласи шаънига путур етказаётган ёлғон хабарларни тарқатаётганларни жазолаш учун барча зарур юридик чораларни кўраман», — деб ёзди Бруза.
Қайд этилишича, Риберининг фамилияси эълон қилинган ҳужжатларнинг уч саҳифасида учрайди. Даъво тарафлардан бири уни ноқонуний фоҳишалик билан боғлиқ алоқаларда айблаган, шунингдек, Риберининг илтимоси билан учинчи шахс томонидан бир одамга ҳужум уюштирилгани ҳақида ҳам баён қилган.
“Zamin”ни Telegram'да ўқинг!
