"Реал Мадрид" бош мураббийи Альваро Арбелоа кечаги муҳим баҳсдан кейин жамоасининг ўйини ва ғалабаси ҳақида ўз фикрлари билан ўртоқлашди.
Мутахассиснинг таъкидлашича, рақиб ўйинни айнан кутилганидек — юқори босим ва фаол прессинг билан бошлаган. Бу эса биринчи бўлимда мадридликлар учун муайян қийинчиликлар туғдирган.
“Биринчи таймда тўп билан ҳаракат қилишда сабр ва хотиржамлик етишмади. Биз шошилдик, қарорлар қабул қилишда хатоларга йўл қўйдик. Аммо пенальтидан кейин ўйин тўлиқ ўзгарди, жамоа ўзини топди”, — деди Арбелоа.
Унинг фикрича, иккинчи бўлимда жамоа темпни бироз пасайтирган бўлса-да, бу режалаштирилган ҳолат бўлган. Мураббий танаффус пайтида айнан шу жиҳатга эътибор қаратганини ҳам алоҳида қайд этди.
“Иккинчи бўлимда суръат пасайгандек кўринди, лекин бу назоратли ўйин эди. Бизда иккинчи голни тезроқ киритиш учун имкониятлар ҳам бўлди. Энг муҳими — жамоа натижа учун курашишни ва уни сақлаб қолишни ўрганяпти”, — дея қўшимча қилди мураббий.
Арбелоа жамоа ғалабасидан мамнун эканини яширмади ва бу натижа футболчиларнинг меҳнати ҳамда тактик интизомининг самараси эканини таъкидлади.
Шунингдек, у рақиб жамоа бош мураббийи — Пеп Гвардиола билан ўзаро ҳурматга асосланган мулоқот бўлганини ҳам айтиб ўтди.
“Гвардиола мени табриклади. Мен эса унга якшанба куни бўлиб ўтадиган финал олдидан омад тиладим”, — деди Арбелоа.
Ушбу ғалаба «Реал» учун нафақат турнир нуқтаи назаридан, балки руҳий жиҳатдан ҳам катта аҳамиятга эга бўлиб, жамоанинг катта ўйинларда қандай ҳаракат қилишни янада яхши ўзлаштираётганини кўрсатди.
“Zamin”ни Telegram'да ўқинг!
