10:53 / 30.03.2026

Тошкентда улкан дуэль: Ҳусанов Рондонга қарши майдонга тушади

Пойтахтимиз яна бир бор катта футбол ҳавоси билан нафас олмоқда. FIFA Series 2026 доирасидаги Ўзбекистон ва Венесуэла ўртасидаги баҳс нафақат икки қитъа жамоаларининг тўқнашуви, балки икки авлод юлдузларининг ўзига хос имтиҳони бўлади.

Янги авлод етакчиси: Абдуқодир Ҳусанов

Ўзбек футболининг бугунги кундаги энг порлоқ вакилларидан бири, 22 ёшли Абдуқодир Ҳусанов замонавий ҳимоя чизиғининг ҳақиқий қўрғонига айланиб бормоқда. Мухлисларнинг ушбу иқтидорли ўйинчидан умидлари осмон қадар баланд. Дисквалификация сабабли Габонга қарши кечган илк баҳсни ўтказиб юборган Абдуқодир, ниҳоят Венесуэла билан ўйинда яшил майдонга тушиши кутилмоқда.

Европа майдонларида, хусусан, Франциянинг «Ланс» ва Англиянинг гранд клуби «Манчестер Сити» таркибида тобланган ҳимоячимиз учун бу учрашув ўз юрти мухлислари қаршисидаги навбатдаги маҳорат дарси бўлади. Абдуқодир фаолияти давомида Мбаппе, Салоҳ, Винисиус ва Беллингем каби дунё юлдузларига қарши муносиб қаршилик кўрсатиб, улкан тажриба тўплади.

Тажриба ва шижоат тўқнашуви

30 март куни Тошкентда бўлиб ўтадиган баҳсда Ҳусановнинг асосий рақиби венесуэлалик афсонавий тўпурар Саломон Рондон бўлади. 36 ёшли Рондон — ҳақиқий футбол сайёҳи. У Испания, Россия, Англия ва Аргентина каби мамлакатларнинг энг кучли клубларида тўп сурган тирик афсонадир.

Рондон халқаро майдонда ҳам ўзига хос натижаларни қайд этган:

Венесуэла терма жамоаси сафида 122 та учрашув;
Рақиблар дарвозасига йўлланган 50 та гол;
Тошкентдаги илк ўйинда захирадан тушиб, 28 дақиқа ичида дубль қайд этгани унинг ҳали ҳам спорт формасида эканидан далолат беради.

Дуэль: Ким ғолиб чиқади?

Эндиликда футбол ишқибозлари янги авлоднинг вакили бўлган тезкор ва совуққон Ҳусанов ҳамда гол сезиш қобилияти юқори бўлган тажрибали Рондон ўртасидаги «дуэл»га гувоҳ бўлишади. Бу баҳс нафақат тактик кураш, балки иродалар тўқнашувидир.