“Челси” бош мураббийи Лиам Росениор “Брайтон”га қарши 0:3 ҳисобидаги оғир мағлубиятдан сўнг жамоа ўйини ва футболчиларнинг майдондаги муносабатидан қаттиқ норозилигини яширмади. Унинг сўзлари клуб ичидаги вазият жиддий эканини кўрсатмоқда.
Росениорнинг таъкидлашича, майдонда курашни тўхтатиб қўйган жамоа ҳақида гапирилишининг ўзи қабул қилиб бўлмайдиган ҳолат. У бу борада барча саволларни тўғридан-тўғри футболчиларга бериш кераклигини айтди:
«Саволларни футболчиларга беринг. Қайси клубда ўйнашингдан қатъи назар, сени курашни ташлаб қўйди деб айтишлари — мутлақо қабул қилиб бўлмайдиган ҳолат. Мен шуни айта оламан, холос», — деди Росениор.
Мутахассис ўзини жуда оғир ва шок ҳолатида ҳис қилаётганини билдириб, бугунги ўйин нафақат унинг тактик қарашларига, балки клубнинг асосий қадриятларига ҳам тўлиқ зид бўлганини таъкидлади. У бундай ҳолат такрорланмаслиги кераклигини очиқ айтди:
«Менга оғир. Мен шокдаман, чунки бугунги ўйин на менинг принципларимга, на клуб қадриятларига мос келди. Бу ўзгариши керак», — деди Росениор.
Росениор ҳозирча барча тафсилотларга кириб бормаслигини, аммо ўзининг аниқ хулосалари борлигини ҳам қўшимча қилди. Унинг фикрича, натижа фақат мураббий зиммасига юкланмайди, жамоавий жавобгарлик ҳам катта аҳамиятга эга:
«Мен ҳозир тафсилотларга батафсил тўхталишни истамайман. Ўз фикрларим бор. Натижа фақат мураббийга боғлиқ эмас», — деди Росениор.
У “Челси” доим кураш, ирода ва характер билан танилиши кераклигини алоҳида урғулаб ўтди. Аммо унинг сўзларига кўра, “Брайтон”га қарши учрашувда бу фазилатларнинг ҳеч бири кўринмаган:
«Бизнинг жамоа доим кураш, ирода ва қатъият тимсоли бўлиши керак. Аммо бугун майдонда бунинг изи ҳам кўринмади», — деди Росениор Sky Sports'га.
Ҳозирги вазият янада ташвишли — “Челси” кетма-кет беш ўйиндан буён гол ура олмаяпти. Бу эса жамоанинг Чемпионлар лигаси йўлланмаси учун курашига жиддий босим олиб келмоқда ва келгуси ўйинлар аҳамиятини янада оширмоқда.
“Zamin”ни Telegram'да ўқинг!
