Англия Премьер-лигасининг 34-туридан ўрин олган баҳсда «Манчестер Юнайтед» ўз майдонида «Брентфорд»ни 2:1 ҳисобида мағлуб этиб, мухлисларини хурсанд қилди. Ушбу учрашувдан сўнг “қизил иблислар” бош мураббийи Майкл Кэррик матбуот вакиллари билан фикрларини баҳам кўрди.
Мураббийнинг таъкидлашича, жамоа ўйинни жуда фаол ва ишончли бошлаган. Илк дақиқалардаёқ ташаббусни қўлга олган “Юнайтед” рақибга босим ўтказишга муваффақ бўлган. Бироқ у “Брентфорд”ни ҳам алоҳида эътироф этди — рақиб жамоа тартибли ва сифатли ўйин намойиш этганини таъкидлади.
Кэррикнинг сўзларига кўра, беллашув давомида вазият ўзгариб борган. “Брентфорд” ўйинга қайтиб, танаффусгача жиддий қаршилик кўрсатган. Шу боис иккинчи бўлимда тактик ўзгаришлар киритишга тўғри келган ва бу қарорлар ўз самарасини берган.
Учрашувнинг ҳал қилувчи дақиқаларида рақибда бир нечта хавфли вазиятлар юзага келган бўлса-да, мураббий ўз шогирдларининг жанговор руҳи ва бирдамлигини алоҳида таъкидлади. Унинг фикрича, айнан жамоавий ҳаракат ва интизом ғалабани таъминлаган асосий омиллардан бири бўлган.
Кэррик мавсумнинг ҳозирги босқичи ҳақида ҳам фикр билдирди. Унинг айтишича, чемпионатнинг ҳал қилувчи палласида ҳар бир очко олтинга тенг ва жамоа бугун айнан шундай муҳим ғалабани қўлга киритган. Қўлга киритилаётган натижалардан у қониқиш ҳосил қилаётганини ҳам яширмади.
Шу билан бирга, мураббийни олдинда янада оғир ва масъулиятли ўйинлар кутаётганини қайд этди. Айниқса, навбатдаги баҳс — "Ливерпул"га қарши тўқнашув жамоа учун катта синов бўлиши кутилмоқда.
Кэррик сўзи якунида ушбу учрашувни катта интиқлик билан кутаётганини ва жамоа бу беллашувга жиддий тайёргарлик кўраётганини таъкидлади. Қисқаси, “Манчестер Юнайтед” ҳозирда яхши формада ва ҳал қилувчи ўйинлар олдидан ишонч билан олға интилаётган жамоалардан бирига айланмоқда.
"Бугун биз учун уч очко жуда муҳим эди. Бу яна бир ғалаба. Олдинда «Ливерпул»га қарши муҳим беллашув кутиб турибди ва биз буни сабрсизлик билан кутяпмиз", — деди мураббий Sky Sports эфирида.
“Zamin”ни Telegram'да ўқинг!
