Саудия Арабистони Про-лигасининг 30-тури доирасида "Ан Наср" ўз майдонида кучли рақиб — "Ал Аҳли"ни қабул қилди. Кескин ва юқори темпда кечган беллашув якунида риёдликлар 2:0 ҳисобида ғалаба қозониб, чемпионлик йўлида яна бир муҳим қадам ташлади.
Учрашувнинг катта қисмида ҳар икки жамоа эҳтиёткор ўйин намойиш этди. Ҳимояда ишончли ҳаракатлар ва марказдаги кураш сабаб голли вазиятлар кам кузатилди. Бироқ иккинчи бўлим охирига келиб, ўйиннинг энг ҳал қилувчи дақиқалари бошланди.
76-дақиқада саҳнага Криштиану Роналду чиқди. У аниқ зарба билан ҳисобни очиб, жамоасига устунликни тақдим этди. Бу гол нафақат ўйин тақдири учун, балки унинг шахсий статистикаси учун ҳам катта аҳамиятга эга бўлди — Роналду фаолиятидаги 970-голини нишонлади.
Ўйиннинг охирги дақиқаларида “Ан Наср” босимни янада кучайтирди. 90-дақиқада Кингсли Коман рақиб дарвозасини иккинчи бор ишғол қилиб, учрашувга нуқта қўйди. Шу тариқа, риёдликлар ишончли ғалабани таъминлади.
Саудия Пролигаси. 30-тур
Ан Наср – Ал Аҳли 2:0
Голлар: Роналду 76, Коман 90
Ан Наср – Бенто, Бушал, Симакан, Ал Амри, Мартинес, Коман, Ал Ҳайбари, Брозович, Мане (Яҳё, 85), Феликс, Роналду (Ал Ҳамдан, 90+1).
Ал Аҳли – Менди, Мажраши, Демирал, Ибанес, Ал Ховсави, Атанагана (Абу Ал Шамат, 78), Ал Жоҳани, Кэссиэ, Маҳрез, Тоуни, Галеноm(Ал Бурайкан, 63).
Бу натижадан сўнг “Ан Наср” очколар сонини 79 тага етказиб, турнир жадвалидаги етакчилигини янада мустаҳкамлади. “Ал Аҳли” эса 71 очко билан учинчи ўринга тушиб кетди ва чемпионлик пойгасида ортда қолмоқда.
Қисқача айтганда, бу ўйинда тажриба ва индивидуал маҳорат ҳал қилувчи омилга айланди. Роналду яна бир бор жамоасини ортидан эргаштира олишини исботлади. Энди савол битта: у 1000 голлик маррага қачон етади?
“Zamin”ни Telegram'да ўқинг!
