Суперлиганинг 11-тури доирасида Термизда бўлиб ўтган «Сурхон» — «Пахтакор» баҳси кутилганидек кескин ва драматик руҳда кечди. Ушбу учрашувда мезбонлар узоқ вақт давомида ғалабага яқин келган бўлса-да, меҳмонлар охирги сонияларда ҳисобни тенглаштириб, бир очкони илиб кетишга муваффақ бўлди.
Биринчи бўлимда ҳар икки жамоа эҳтиёткор ўйин намойиш этди. Майдон марказида кураш кучли бўлиб, хавфли вазиятлар кам кузатилди. Аммо 42-дақиқада «Сурхон» ўз имкониятидан унумли фойдаланди — Суннатилла Абдуллажонов аниқ зарба билан ҳисобни очиб, мезбонларни олдинга олиб чиқди.
Иккинчи бўлимда «Пахтакор» ўйинни ўз назоратига олишга ҳаракат қилди. Тошкентликлар ҳужумларни кучайтириб, рақиб дарвозаси олдида бир неча хавфли вазиятлар яратди. Аммо «Сурхон» ҳимояси узоқ вақт давомида ишончли ҳаракат қилиб, устунликни сақлаб турди.
Учрашув сўнгги дақиқаларига келиб босим янада ортди. Ҳакам қўшиб берган вақтда «Пахтакор» кутилган голни урди — бурчак зарбасидан кейин захирадан майдонга тушган Шаҳзод Азмиддинов аниқ зарба йўллаб, ҳисобни 1:1 кўринишига келтирди.
Суперлига. 11-тур
Сурхон — Пахтакор 1:1
Голлар: Абдуллажонов 42 — Азмиддинов 90+4
Сурхон: Мерганов, Жумаев, Шамсиев, Турсунов, Шербўтаев, Абдуллажонов (Шукуруллаев 80), Ашубоев, Абдуҳамидов (Рамозонов 72), Қодиров (Чинеду 68), Мусахонов (Неъматхонов 80), Шайдулов.
Пахтакор: Назаров, Ҳамралиев, Алижонов, Эркинов (Бозоров 73), Ҳамдамов (Ресан 61), Пажишек (Турдимуродов 73), Бўриев, Собирхўжаев (Мозговой 73), Насруллаев, Фламарион, Абдумажидов.
Огоҳлантиришлар: Бўриев 24, Ҳамралиев 73.
Шу тариқа, «Пахтакор» мағлубият остонасидан қайтиб, муҳим бир очкони қўлга киритди. Бу натижа орқали жамоа 26 очко билан 2-ўринда қолди ва пешқадамлик имкониятини бой берди.
«Сурхон» эса ўз навбатида ғалабани қўлдан чиқарган бўлса-да, очколар сонини 12 тага етказиб, турнир жадвалида 12-поғонага кўтарилди.
Умуман олганда, бу баҳс мухлисларга ҳақиқий футбол драмасини тақдим этди — интрига, кураш ва сўнгги сониялардаги ҳал қилувчи гол ўйинга алоҳида ҳусн бағишлади.
“Zamin”ни Telegram'да ўқинг!
