Тоттенхем ярим ҳимоячиси Дежан Кулусевски узоқ давом этган тизза жароҳати туфайли Швеция терма жамоасининг жаҳон чемпионати учун эълон қилинган таркибидан жой олмади. 26 ёшли футболчи 2025-йилнинг май ойида Кристал Пеласга қарши ўйинда жиддий жароҳат олганидан буён майдонга туша олмаяпти. Бу ҳақда Goal.com хабар беради.
Швеция бош мураббийи Грем Поттер 26 нафар футболчидан иборат якуний рўйхатни тасдиқлади. Кулусевски тикланиш жараёнини чет элда ўтказган бўлса-да, у тўлиқ машғулотларга қайта олмади. Тоттенхем бош мураббийи Роберто Де Зерби футболчининг жорий мавсумда бирорта ҳам ўйин ўтказмаганини инобатга олиб, унинг турнирда иштирок этиши қийин бўлишини аввалроқ таъкидлаган эди.
Швеция терма жамоаси таркибида Англия Премер-лигасининг бошқа юлдузлари, хусусан, Арсенал ҳужумчиси Виктор Гёкерес ва Ливерпул вакили Алехандер Исак жой олди. Шунингдек, Тоттенхемнинг ёш иқтидорли футболчиси Лукас Бергвалл ҳам терма жамоа билан АҚШга йўл оладиган бўлди.
“Zamin”ни Telegram'да ўқинг!
