Реал Мадрид жамоаси бош мураббийи лавозимига асосий номзод сифатида Хосе Моуриньо кўрилаётган бўлса-да, клуб раҳбарияти захира вариантларини ҳам тайёрлаб қўймоқда. Радио Марка журналисти Раул Варела хабарига кўра, агар португалиялик мутахассис билан келишув амалга ошмай қолса, Мадрид клуби Бундеслига собиқ мураббийи Пеллегрино Матараззони асосий номзод сифатида кўриб чиқмоқда. Бу ҳақда Goal.com хабар беради.
Флорентино Перез Альваро Арбелоа ўрнини эгаллаши мумкин бўлган номзодлар рўйхатини таҳлил қилмоқда. Матараззонинг замонавий футбол фалсафаси ва тактик ёндашуви Бернабеуда юқори баҳоланмоқда, бироқ 48 ёшли америкалик мутахассиснинг Испания пойтахтига кўчиб ўтиши ҳозирча кам эҳтимолли воқеа сифатида қаралмоқда.
Айни дамда Мадридда Хосе Моуриньонинг тайинланишига бўлган ишонч юқори. Трансферлар бўйича эксперт Сача Таволиери келишув аллақачон якунланганини ва клуб яқин ҳафта ичида расмий баёнот бериши мумкинлигини таъкидламоқда. Моуриньонинг Бенфика билан 2027-йилгача мўлжалланган шартномасида 3 миллион евролик товон пули мавжуд.
Пеллегрино Матараззо эса 2025-йил декабрь ойида Реал Сосиедад бошқарувини қабул қилиб олган эди. У қисқа вақт ичида жамоа ўйинини тубдан ўзгартириб, уларни ЛаЛига турнир жадвалининг юқори қисмига қайтарди ва Испания Кубогини қўлга киритишга муваффақ бўлди. Шу сабабли, жамоа келаси мавсум учун Европа лигаси йўлланмасини нақд қилиб қўйди.
“Zamin”ни Telegram'да ўқинг!
