Машҳур мураббий Хосе Моуриньо Бенфика клубидан келиб тушган янги шартнома таклифини кўриб чиқишдан бош тортди. Португалиялик мутахассис жорий мавсум якунлангунига қадар ҳеч қандай музокаралар олиб бормаслигини ва барча масалаларни якшанба кунидан кейин ҳал қилишини маълум қилди. Бу ҳақда Goal.com хабар беради.
Моуриньо Диарио АС нашрига берган интервюсида шартнома таклифи агентига юборилганини, аммо у буни ўқиб ҳам кўрмаганини таъкидлади. Унинг сўзларига кўра, клуб ҳар қандай шахсдан, жумладан мураббийдан ҳам устун туради, шунинг учун вазиятдан хавотирланишга ҳожат йўқ.
Ушбу баёнотлар ортидан мутахассиснинг Реал Мадрид жамоасига қайтиши мумкинлиги ҳақидаги миш-мишлар янада кучайди. Испания матбуоти Моуриньони Альваро Арбелоа ўрнини эгаллаши мумкин бўлган асосий номзод сифатида кўрмоқда.
Келаси ҳафта ҳам мураббий, ҳам Бенфика учун ҳал қилувчи паллага айланади. Мавсум якунлангач, томонлар келажак борасида якуний қарорга келишлари кутилмоқда. Айни дамда Моуриньо барча эътиборини жамоасининг Эсторилга қарши ўтказадиган сўнгги ўйинига қаратган.
“Zamin”ни Telegram'да ўқинг!
