Реал Мадрид бош мураббийи лавозимига Хосе Моуриньони қайтаришни режалаштирмоқда, бироқ бу трансфер осон кечмайди. Португалиялик мутахассиснинг ҳозирги клуби Бенфика билан тузган шартномасида махсус товон пули банди мавжуд бўлиб, унга кўра, Мадрид клуби мураббийни олиб кетиш учун қарийб 7 миллион евро тўлаши талаб этилади. Бу ҳақда Goal.com хабар беради.
Рекорд нашрининг хабар беришича, ушбу товон пули мавсум якунланганидан кейинги 10 кунлик муддат ичида шартнома бекор қилинган тақдирда амал қилади. Бенфика президенти Руи Коста жамоада барқарорликни сақлаб қолиш мақсадида Моуриньога янги шартнома таклиф қилган ва мураббийнинг қарорини кутмоқда.
Реал Мадрид президенти Флорентино Перез эса клубдаги сайлов жараёнлари ва бошқарув масалаларига эътибор қаратган. У мураббий алмашинуви ҳақидаги саволларга аниқ жавоб беришдан қочиб, ҳозирги асосий мақсад клубни аъзоларга қайтариш эканлигини таъкидлади.
Агар Моуриньо Мадридга йўл оладиган бўлса, Бенфика раҳбарияти унинг ўрнига номзодлар излашни бошлаб юборган. Асосий даъвогар сифатида Англия Премер-лигасида муваффақиятли ишлаётган Фулхем бош мураббийи Марко Силва кўрилмоқда.
“Zamin”ни Telegram'да ўқинг!
