Мадриднинг “Реал” клубида катта ўзгаришлар бошланиши мумкин. Жамоанинг бўлажак бош мураббийи сифатида тилга олинаётган Жозе Моуриньо аллақачон таркибни кучайтириш бўйича режаларни муҳокама қилаётгани айтилмоқда.
“AS” нашри маълумотига кўра, португалиялик мутахассис Мадридга қайтгач, аввало ҳимоя чизиғини мустаҳкамлашга эътибор қаратмоқчи. Моуриньонинг биринчи трансфер мақсади сифатида “Манчестер Сити” ҳимоячиси Йошко Гвардиол номи тилга олинмоқда.
24 ёшли хорватиялик футболчи сўнгги йилларда Европанинг энг кучли ҳимоячиларидан бири сифатида эътироф этилмоқда. У жисмоний куч, тезлик, тўп билан ишлаш маҳорати ва ҳужумга қўшилиш қобилияти билан ажралиб туради. Айнан шу жиҳатлар Моуриньо учун муҳим бўлиши мумкин.
“Transfermarkt” портали маълумотига кўра, Гвардиолнинг бозор қиймати 70 миллион еврони ташкил этади. Унинг “Манчестер Сити” билан амалдаги шартномаси 2028 йилнинг ёзигача мўлжалланган. Шу сабабли бу трансферни амалга ошириш “Реал” учун осон бўлмайди.
Жорий мавсумда Йошко Гвардиол “шаҳарликлар” сафида 24 та учрашувда майдонга тушиб, 2 та гол ва 5 та голли узатма қайд этди. Ҳимоячи учун бу анча яхши кўрсаткич ҳисобланади.
Моуриньо ҳар доим ҳимояда тартиб, интизом ва кучли характерга катта аҳамият берадиган мураббий сифатида танилган. Шу боис унинг “Реал”даги янги лойиҳани айнан орқа чизиқни кучайтиришдан бошламоқчи экани мантиқий кўринади.
Қисқаси, Моуриньо Мадридга қайтса, “Реал” трансфер бозорида жиддий ҳаракат қилиши мумкин. Гвардиол эса бу янги даврнинг илк йирик харидига айланиши эҳтимолдан холи эмас. “Особенный” қайтса, ҳимоядан бошлайди — классика, лекин ишлайдиган классика.
“Zamin”ни Telegram'да ўқинг!
