Оғир вазнда амалдаги UFC чемпиони Том Аспиналл Нидерландия вакили Рико Верхувеннинг украиналик Александр Усикка қарши эҳтимолий имкониятлари ҳақида фикр билдирди. Англиялик жангчи ҳар икки спортчининг кучли томонларини баҳолар экан, бу тўқнашув осон кечмаслигини таъкидлади.
Аспиналлнинг айтишича, у Рико Верхувенни жуда яхши билади. Улар ўн йил давомида бирга спарринг ўтказган ва шу сабабли Том нидерландиялик жангчини нафақат кучли спортчи, балки ўзининг яқин дўсти сифатида ҳам кўради. Шунга қарамай, UFC чемпиони баҳода ҳиссиётга берилмасдан, вазиятга холис қарашга ҳаракат қилди.
“Рико билан ўн йил спарринг қилганман. Шунинг учун уни жуда яхши биламан ва уни бемалол дўстим деб аташим мумкин. Верхувен кучли йигит, лекин Усик — ҳаддан ташқари юқори даражадаги боксчи. Рико дўстим бўлса ҳам, ростини айтишим керак. Уни жуда оғир синов кутмоқда”, — деди Аспиналл.
Дарҳақиқат, Александр Усик бугунги бокс оламида энг техник, ақлли ва ҳаракатчан оғир вазн вакилларидан бири ҳисобланади. Унинг оёқдаги ҳаракати, масофани ҳис қилиши, рақиб зарбасини олдиндан ўқиши ва жанг давомида темпни ўзгартириш қобилияти ҳар қандай рақиб учун мураккаб муаммо туғдиради.
Бироқ Аспиналл Верхувенни бутунлай имкониятсиз деб ҳисобламаяпти. Унинг фикрича, нидерландиялик спортчи ўзининг йирик габарити, жисмоний устунлиги ва кикбоксингдаги катта тажрибасидан тўғри фойдаланса, Усикка жиддий қийинчилик туғдириши мумкин. Айниқса, яқин масофада босим ўтказиш ва кучли зарбалар орқали украиналик боксчининг режасини бузиш эҳтимоли бор.
Том Аспиналлнинг яна бир қизиқ фикри шундаки, у Рико Верхувенни бокс нуқтаи назаридан Фрэнсис Нганнудан юқорироқ баҳолади. Унингча, Верхувен боксда Нганнудан анча яхшироқ ҳаракат қилади. Бу фикр жанг атрофидаги қизиқишни янада ошириши табиий.
“Менимча, бу тўқнашувда ҳар ким ғалаба қозониши мумкин. Иккисида ҳам имконият бор. Агар Верхувен йирик габаритидан унумли фойдаланса, Усикка жиддий муаммо туғдириши аниқ. Чунки боксда Рико Фрэнсис Нганнудан анча яхшироқ”, — деди англиялик чемпион.
Усик учун бу жанг яна бир катта синов бўлиши мумкин. Чунки у техник жиҳатдан устун бўлса-да, Верхувен каби жисмонан бақувват ва катта тажрибага эга рақибга қарши доимий равишда ҳаракатда бўлиши, масофани назорат қилиши ва ортиқча хавфга йўл қўймаслиги керак бўлади.
Верхувен эса бундай имкониятдан максимал фойдаланиши шарт. У учун ғалаба фақат спорт натижаси эмас, балки бокс оламида ҳам ўзини юқори даражада кўрсатиш имкониятидир. Бундай жангларда бир зарба, бир хатолик ёки бир тўғри танланган тактика бутун сценарийни ўзгартириб юбориши мумкин.
Эслатиб ўтамиз, Рико Верхувен ва Александр Усик ўртасидаги баҳс Ўзбекистон вақти билан 23 майдан 24 майга ўтар кечаси бўлиб ўтади.
Қисқаси, Том Аспиналл Усикни фавқулодда юқори даражадаги боксчи деб тан олди, аммо Верхувенни ҳам жиддий хавф сифатида баҳолади. Бу жангда техника ва ҳаракат жисмоний куч ҳамда габаритга қарши тўқнашади. Кўринишидан, тун уйқусини қурбон қилишга арзийдиган жанг бўлади.
“Zamin”ни Telegram'да ўқинг!
