Испания терма жамоаси бош мураббийи Луис де ла Фуенте 2026-йилги Жаҳон чемпионати учун якуний 26 кишилик таркибни эълон қилди. Мазкур рўйхатда Барселона клубининг саккиз нафар вакили жой олгани ҳолда, тарихда илк бор Реал Мадрид жамоасидан бирорта ҳам футболчи Испания қайдномасига киритилмади. Бу ҳақда Goal.com хабар беради.
Каталония клубидан Жоан Гарсиа, Эрик Гарсиа, Пау Кубарси, Гави, Педри, Дани Олмо, Ферран Торрес ва Ламине Ямал каби юлдузлар Шимолий Америкадаги турнирга йўл оладиган бўлди. Шу билан бирга, Реал Мадрид ҳимоячиси Дани Карвахаль ва ёш иқтидор Деан Ҳуижсен каби футболчиларнинг рўйхатдан ташқарида қолгани Испания пойтахтида катта муҳокамаларга сабаб бўлди.
Луис де ла Фуенте ўз жамоасининг имкониятларини юқори баҳолаб, Испанияни турнир фаворитлари қаторига қўшди. "Биз эҳтиёткор бўлишимиз керак, аммо фаворит эканимизни яширмайман. Англия ёки Франция каби биз ҳам чемпионликка асосий даъвогармиз. Энг қийин жараён — муносиб футболчиларни таркибдан чиқариб ташлаш бўлди", — деди 64 ёшли мутахассис.
Таркибда Англия Премер-лигаси вакиллари ҳам талайгина. Хусусан, Манчестер Сити ярим ҳимоячиси Родри ҳамда Арсенал аъзолари Давид Рая, Мартин Зубименди ва Микел Мерино якуний рўйхатга киритилган. Жароҳатидан тикланаётган Нико Виллиаms ҳам таркибдан жой олди, бироқ Фермин Лопес оёғидаги синиш туфайли турнирни ўтказиб юборади.
“Zamin”ни Telegram'да ўқинг!
