Бразилиялик дарвозабон Алиссон келаси мавсумда ҳам Ливерпул таркибида қолиши кутилмоқда. Италиянинг Ювентус клуби томонидан билдирилаётган жиддий қизиқишларга қарамай, Мерсисайд клуби ўз посбонини Энфилдда олиб қолиш ниятида қатъий турибди. Бу ҳақда Goal.com хабар беради.
Англия Премер-лигаси якунланганидан сўнг, Алиссоннинг келажаги борасидаги турли миш-мишлар авж олган эди. Айниқса, жароҳатидан сўнг Брентфордга қарши ўйинда майдонга тушиши кўпчилик мухлисларда бу унинг жамоадаги сўнгги учрашуви бўлиши мумкинлиги ҳақида хавотир уйғотди. Бироқ, клуб раҳбарияти 33 ёшли дарвозабон билан амалдаги шартномани узайтириш бандини фаоллаштириб, унинг жамоа режаларидаги ўрни муҳимлигини кўрсатиб қўйди.
Италия матбуоти, хусусан, Ла Gazzetta делло Sport нашри Ювентус май ойида футболчи билан шахсий шартнома шартларини муҳокама қилгани ҳақида хабар тарқатган эди. Туринликлар янги асосий дарвозабон қидираётган бўлса-да, клублар ўртасида ҳали ҳеч қандай расмий келишувга эришилмаган.
Таниқли инсайдер Fabrizio Romano ўзининг Х саҳифасида Ливерпул раҳбарияти Алиссон билан боғланиб, уни яна бир йил жамоада олиб қолиш ниятида эканлигини маълум қилганини ёзди. Романонинг сўзларига кўра, Ювентус узоқ муддатли шартнома таклиф қилган бўлса-да, Ливерпул сотувга розилик бермаяпти.
Ҳозирча барчаси футболчининг ўз позициясига боғлиқ бўлиб турибди. Агар Алиссоннинг ўзи кетишни талаб қилмаса, Ливерпул уни трансферга қўймайди. Мавсум якунида жароҳатдан муваффақиятли қайтиши унинг жамоа учун нақадар қадрли эканлигини яна бир бор исботлади.
“Zamin”ни Telegram'да ўқинг!
