Барселона клуби жаҳон футболининг бўлажак юлдузларини излашда давом этмоқда ва скаутлар эътибори яна Бразилия бозорига қаратилди. Каталония гранди Жанубий Америкада порлаётган янги иқтидор эгасини ўз трансфер рўйхатига киритди. Бу ҳақда Goal.com хабар беради.
Атлетико Минеиро ёшлар жамоаси аъзоси, 16 ёшли Габриел Венено Барселона спорт директори Деконинг назарига тушди. Техник маҳорати ва ўйин услуби туфайли уни аллақачон "янги Неймар" деб аташмоқда. Ўнг қанот ҳужумчиси жорий йилнинг бошида нуфузли Копинҳа турнирида ўзини кўрсатиб, кўплаб Европа клублари скаутларида ижобий таассурот қолдирди.
АС нашри хабарига кўра, Атлетико Минеиро ўз тарбияланувчиси учун тахминан 20 миллион евро ва қўшимча бонуслар талаб қилмоқда. Бу ҳали асосий жамоада дебют қилмаган футболчи учун анча юқори нарх ҳисобланади.
Барселона раҳбарияти ушбу трансфер борасида бир қарорга келиши қийин кечмоқда. Бир томондан клубнинг молиявий чекловлари бўлса, иккинчи томондан Габриел Венено айнан Ламине Ямал ҳаракат қиладиган позицияда ўйнайди. Шу сабабли, клуб раҳбарияти ёш юлдузга рақобатчи сотиб олиш масаласини чуқур таҳлил қилмоқда.
“Zamin”ни Telegram'да ўқинг!
