“Кристал Пэлас” бош мураббийи Оливер Гласнер фаолиятидаги навбатдаги катта совринни қўлга киритди. Лондон клуби Лейпциг шаҳрида бўлиб ўтган Европа Конференциялар лигаси финалида Испаниянинг “Райо Валекано” жамоасини 1:0 ҳисобида мағлуб этиб, тарихий ғалабага эришди.
Финалдаги ягона гол “бургутлар”га Европа майдонидаги муҳим совринни тақдим этди. Бу 51 ёшли австриялик мутахассис учун “Кристал Пэлас”даги яна бир ёрқин саҳифа бўлди. Энг қизиғи, ушбу беллашув Гласнернинг жамоа бош мураббийи сифатидаги сўнгги ўйини бўлди.
Оливер Гласнер 2025 йилда “Кристал Пэлас” билан катта муваффақиятларга эришди. Аввалроқ у клубни Англия Кубоги ва Англия Суперкубоги ғолиблигига олиб келган эди. Энди эса Конференциялар лигаси соврини ҳам лондонликлар музейидан жой олади.
Бу натижалар “Кристал Пэлас” учун оддий мавсум эмас, балки тарихий давр бўлганини кўрсатади. Клуб катта номлар соясида қолиб кетмасдан, ўз ўйини, характери ва интизоми орқали бир нечта совринга эга чиқди. Бунда Гласнернинг ҳиссаси жуда катта.
Австриялик мураббий жамоага тартиб, ишонч ва аниқ ўйин услубини олиб кирди. У “Пэлас”ни рақиблар учун ноқулай, жисмонан тайёр ва психологик жиҳатдан мустаҳкам жамоага айлантира олди. Финалдаги совуққон ғалаба ҳам шу меҳнатнинг натижаси бўлди.
Бироқ ушбу муваффақиятга қарамай, Оливер Гласнер тез орада “Кристал Пэлас”ни тарк этади. Шу боис “Райо Валекано”га қарши финал унинг лондонликлар билан хайрлашув учрашувига айланди. Аммо бундай хайрлашувни ҳар қандай мураббий орзу қилса керак: сўнгги ўйин, Европа финали ва қўлда соврин.
Гласнернинг еврокубоклардаги тажрибаси ҳам алоҳида эътиборга лойиқ. У 2021/22 йилги мавсумда Германиянинг “Айнтрахт” клубини Европа Лигаси ғолиблигига олиб чиққан эди. Энди эса “Кристал Пэлас” билан Конференциялар лигасида зафар қучди. Шу тариқа, мутахассис фаолияти давомида иккита турли еврокубок мусобақасида ғолиб чиқишга эришди.
Оливер Гласнер мураббийлик фаолияти давомида Австриянинг “Рид” ва ЛАСК, Германиянинг “Волфсбург” ҳамда “Айнтрахт” клубларида ҳам ишлаган. У ҳар бир жамоада ўз иш услуби, интизомга асосланган ёндашуви ва футболчилар билан тўғри муносабати орқали ҳурмат қозонган.
“Кристал Пэлас”даги даври эса унинг фаолиятидаги энг эсда қоларли босқичлардан бири бўлиб қолади. Қисқа вақт ичида Англия Кубоги, Англия Суперкубоги ва Конференциялар лигаси каби совринларни қўлга киритиш — ҳар қандай мураббий учун катта натижа.
Қисқаси, Оливер Гласнер “Кристал Пэлас” билан сўнгги ўйинида яна бир совринга эга чиқди. “Бургутлар” Конференциялар лигаси финалида “Райо Валекано”ни мағлуб этиб, тарихий ғалаба қозонди. Гласнер клубни тарк этмоқда, аммо у кетишдан олдин эшикни оддий ёпмади — соврин билан “boom” қилиб чиқиб кетди.
“Zamin”ни Telegram'да ўқинг!
