PSJ ҳужумчиси Усман Дембеле яқинда олган болдир жароҳатига қарамай, Арсенал жамоасига қарши бўлиб ўтадиган Чемпионлар лигаси финалида иштирок этишга тўлиқ тайёр эканлигини тасдиқлади. Франциялик футболчи соғлиғини тиклаб олган, шунингдек, жамоанинг ҳужумкор ҳимоячиси Ашраф Хакими ҳам Будапештдаги ҳал қилувчи баҳсда асосий таркибда майдонга тушишга рухсат олди. Бу ҳақда Goal.com хабар беради.
Парижликлар кетма-кет иккинчи марта қитъа миқёсидаги финалга чиқиш олдидан муҳим хушхабар олишди. Дембеле 17-май куни Париж клубига қарши ўйинда жароҳат олиб, майдонни эрта тарк этганида мухлисларда хавотир уйғотган эди. Ашраф Хакими эса апрель ойи охирида Бавария билан баҳсда олинган сон жароҳатидан сўнг сафга қайтди. Ҳар икки футболчи Пускас Арена сари йўл олишдан аввал тўлиқ машғулотларга қўшилди.
Матбуот анжуманида сўзга чиққан Дембеле ўз ҳолати ҳақидаги шубҳаларни рад этди: “Финални ўтказиб юборишдан ҳеч қачон қўрқмаганман. Тайёргарлик учун ўн-ўн беш кун вақтим бор эди. Ҳозир ўзимни 100 фоиз тайёр ҳис қиляпман, бутун жамоа ҳам жангга шай”. Шунингдек, у рақиб ҳақида ҳам тўхталиб, Арсенал жамоасининг ҳужум ва ҳимоядаги мувозанатини, айниқса, стандарт вазиятлардаги хавфлилигини алоҳида эътироф этди.
Франциялик вингер Луис Энрике қўл остида совринлар ютишга бўлган иштиёқи сўнмаганини таъкидлади. Мураббий ҳам Ашраф Хакими ўйинга тайёр эканлигини тасдиқлаган. Дембеле PSJ сафида масъулияти ошганини ва асосий мақсади шахсий ютуқлар эмас, балки клуб билан бирга кубокларни қўлга киритиш эканлигини қўшимча қилди.
“Zamin”ни Telegram'да ўқинг!
