Париж клуби Европадаги энг нуфузли мусобақада яна ўз кучини намойиш этди. Будапештда бўлиб ўтган УЕФА Чемпионлар лигаси финалида “PSJ” ва “Арсенал” клублари ўзаро тўқнаш келди. Учрашув асосий вақти 1:1 ҳисобида якунланди, ғолиб эса пеналтилар сериясида аниқланди.
Лондонликлар ўйинни жуда фаол бошлашди. 6-дақиқада “Арсенал” ҳужумчиси Кай Хаверс дарвозани ишғол қилиб, жамоасини олдинга олиб чиқди. Шу голдан кейин “PSJ” босимни кучайтирди ва иккинчи бўлимда ҳисобни тенглаштиришга эришди. 65-дақиқада Усмон Дембеле пеналтини аниқ бажариб, парижликларга муҳим голни тақдим этди.
Асосий вақтда ғолиб номи аниқланмагач, финал тақдири пеналтилар сериясига қолди. Унда “PSJ” футболчилари совуққонроқ ҳаракат қилишди ва 4:3 ҳисобида зафар қучишди. Луис Энрике бошчилигидаги жамоа шу тариқа ўтган мавсумдаги муваффақиятини такрорлаб, ўз тарихида иккинчи марта Чемпионлар лигаси кубогини қўлга киритди.
Бу ғалаба “PSJ” учун тарихий аҳамиятга эга бўлди. Париж клуби Чемпионлар лигасининг янги форматида кетма-кет чемпионликни қўлга киритган илк жамоа сифатида тарихга кирди. “Арсенал” эса финалда муносиб қаршилик кўрсатган бўлса-да, ҳал қилувчи лаҳзаларда омад “PSJ” томонида бўлди.
“Zamin”ни Telegram'да ўқинг!
