Умид Аҳмаджонов: «Яқин келажакда мамлакатимиз футболида VAR тизимини йўлга қўямиз»

Ўзбекистон Миллий олимпия қўмитаси президенти, ЎФА биринчи вице-президенти Умид Аҳмаджонов футболни янада ривожлантириш ва Суперлига ўйинларининг шаффоф ўтишин таъминлаш мақсадида йиғилиш ташкил қилди. МОҚ мажлислар залида ўтган мазкур йиғилишда ЎФА ва ПФЛ мутасаддилари, Суперлига клубларининг бош мураббийлари иштирок этди.

Йиғилиш давомида Умид Аҳмаджонов футболимизда юзага келаётган камчиликлар, оқсалишлар ва келишилган ўйинлар хусусида тўхталиб ўтди.

«Футболимизни имкон қадар тезроқ Европа даражасига олиб чиқишимиз керак. Бунинг учун барчамиз бирдам бўлиб ишлашимиз талаб этилади. Келишилган ўйинларга аралашган шахсларни оғир жазо кутиб турибди. Футбол фақат мухлислар учун. Ҳозир ўйинларни 18 та телекамера тасвирга олиши ва VAR тизимини қўллаш бўйича янги лойиҳа устида ишлаяпмиз. Мухлисларга шаффоф ўйин намойиш қилишни таъминлашимиз лозим. Ўйин вақтини чўзадиган футболчилар жиддий жазолансин. Уларга сариқ ва қизил карточкаларни аямасдан кўрсатинглар. Керак бўлса, жамоага техник мағлубият ёзилсин. Эртага бошланадиган янги турдан мана шу тизимни татбиқ қилайлик», — деди Умид Аҳмаджонов.

Йиғилиш давомида Умид Аҳмаджонов футболни янада ривожлантириш борасида тегишли кўрсатма ва чора-тадбирлар, қилиниши керак бўлган ишлар юзасидан масъул мутасаддиларга қўшимча кўрсатмалар берди. Шунингдек, ПФЛ раҳбарлари мухлислар учун стадионларда қулай шарт-шароитлар яратиш, барча стадионларда оилавий секторлар ташкил этиш, ўйин вақтини белгилаш вақтида кўпгина мезонларни ҳисобга олиш борасида керакли топшириқларни қабул қилиб олишди. “Замин” янгиликларини “Инстаграм”да кузатиб боринг