11:30 / 02.02.2021
1 823

“Женоа” ва Шомуродов мухлислари ўқисин!

“Женоа” ва Шомуродов мухлислари ўқисин!
Давиде Баллардини келганидан кейин “Женоа” жамоаси А Серия мусобақа жадвалида юқорига кўтарила бошлади. Бу мутахассис қўл остидаги чемпионат ўйинларида тўрт ғалаба, икки дуранг ва бир мағлубият қайд этган генуялик футболчилар охирги ўриндан 14-поғонага чиқиб олди ва хавфли ҳудудни тарк этди.

Муваффақиятли ўйнай бошлаган “Женоа” сардори Доменико Кришито журналистларга интервью бериб, илгари ўзи ўйнаган Россия чемпионатидан А Серияга кўчиб ўтган футболчилар, хусусан, Элдор Шомуродов ҳақида ҳам фикр билдирди. Эътиборингизга ушбу интервьюни ҳавола қиламиз.

- Ўтган йилги коронавирус касаллиги ва жароҳатлардан кейин ўзингизни қандай ҳис қиляпсиз?
- Раҳмат, ҳозир анча яхши. Кўриб турганингиздек, ҳамон майдонда жавлон уряпман. Энг муҳими, жамоамиз кейинги пайтда барқарор равишда очко тўплаяпти. Мен “Женоа” А Серияда қолишига ишонаман.

Элдор Шомуродов ҳақида нима дейсиз?
- У ажойиб футболчи. Бошида уятчан йигит кўринганди, лекин тез орада курашувчанлиги билан асосий таркибга киришни удаллади. Шомуродов ўз ўйини ва майдондан ташқаридаги хулқ-атвори билан мени ҳайратга солди. Элдор жуда кучли ва жамоа учун ўта фойдали ўйинчи. Майдондаги курашларда ўзини аямайди ва катта ҳажмдаги ишларни бажармоқда. Бундан ташқари, итальянчада ҳам гаплаша бошлади. Браво!

- Яқинда “Аталанта”га қарши ўйнадинглар. Алексей Миранчук ҳақида нима дея оласиз?
- Ўйиндан олдин биз у билан саломлашдик. Миранчук ўз кучини А Серияда синаб кўришга қарор қилгани яхши бўлди. Алексей иқтидорли футболчи, мен буни “Локомотив”даги ўйинлари орқали биламан. Лекин “Аталанта”да рақобат ўта кучли бўлгани учун мунтазам майдонга тушиши қийин кечмоқда.

- “Фиорентина” яқинда Александр Кокоринни таркибга қўшиб олди. Бу борада фикрингиз қандай?
- Мен Александрни табриклайман ва унга чин дилдан муваффақият тилайман. Менга унинг ўйини ёқади ва Флоренцияда ўзини кўрсата олишига тилакдошман.

- Унинг собиқ жамоангиз “Зенит”даги ўйинларини қандай баҳолайсиз?
- Кокоринни тажрибали мураббийлар Фабио Капелло ва Роберто Манчини бежизга мақтамаган. Билишимча, Александр жамоадошлари билан ҳам яхши чиқишадиган футболчи. Бироқ , “Фиорентина”да унга осон бўлмайди, чунки унинг хорижда ўйнаш бўйича тажрибаси йўқ. Кокорин ўзини синаб кўришни истади. Унга омад!

- “Зенит”нинг натижаларини кузатиб борасизми?
- Албатта, “Зенит” Россиядаги севимли клубим, Петербург эса мен яхши кўрган шаҳар. Мен Сергей Семак “Зенит” билан қаторисига учинчи бор чемпионликни нишонлашига ишонаман.

Ctrl
Enter
Хато топдИнгизми?
Иборани ажратиб Ctrl+Enter тугмасини босинг
Фикрлар (0)


Янгиликлар » Спорт » “Женоа” ва Шомуродов мухлислари ўқисин!