Хитой хакерлари АҚШдаги 20 та муҳим объект тизимларини бузиб кирди

Ўтган йил давомида хитойлик хакерлар АҚШдаги йигирмага яқин муҳим объектлар, жумладан, инфратузилма объектларининг компьютер тизимларига кириб борган. Бу ҳақда Тhе Washington Post нашри ёзмоқда.

Нашрнинг таъкидлашича, хитойлик хакерлар бузиб кирган тизимлар орасида Гавайи штатидаги сув таъминоти тизими билан боғлиқ объект, АҚШ Тинч океани соҳилидаги йирик порт ва нефть ва газ қувури бор. Бундан ташқари, Техас штатидаги электр тармоқлари оператори киберҳужумларга учраган. Аниқлик киритилишича, мазкур объектлар фаолиятида ҳеч қандай узилишлар кузатилмаган.

Нашр экспертлари бу ҳаракатлар “Тинч океанида АҚШ-Хитой можароси юзага келганда ваҳима, тартибсизлик ёки логистикани бузиш йўлларини ишлаб чиқиш бўйича саъй-ҳаракатларнинг бир қисми” эканини таъкидлашган.