iPhone 8 камераси тўлдирилган реаллик функциясига эга бўлиши мумкин

Apple компанияси келгуси йилда эълон қилинадиган iPhone 8 камерасига тўлдирилган реаллик функциясини татбиқ этишни режалаштирган. Шу мақсадда айни пайтда махсус муҳандислар жамоаси кейинги авлод флагманининг камераси устида иш олиб боряпти, деб ёзмоқда Terabayt.uz сайти.

Ушбу функцияни смартфонга татбиқ этиш учун Купертино гиганти томонидан сўнгги йилларда сотиб олинган турли стартаплар ишлаб чиққан технологиялардан фойдаланилмоқди. Мазкур функциянинг ишлаш жараёни қуйидагича тасвирланган: iPhone 8 фойдаланувчиси қурилма камерасини бирор предметга йўналтиради, камера эса мазкур предметни аниқлаб, тармоқда у ҳақда мавжуд бўлган маълумотни акс эттиради. Шунингдек, кейинги флагман “олма”нинг камераси фойдаланувчиларнинг юзини янада тезроқ аниқлаш имкониятига ҳам эга бўлади.

Эслатиб ўтамиз, интернет тармоғидаги етакчи нашрларда яқинда берилган хабарга кўра, Apple айни пайтда тўлдирилган реаллик функциясига эга бўлган ақлли кўзойнакларни синовдан ўтказишни бошлаб юборган. Ҳозирча ушбу кўзойнакнинг қачон намойиш этилиши номаълум. «Замин»ни Telegram’да ўқинг!