Кўзингиз крипто учун калитми? World криптовалютаси ҳақида нималар маълум?

^{Фото: Видеодан кадр}
OpenAI асосчиси Сэм Альтман ҳамда унинг Tools for Humanity стартапи янги технологияни амалиётга жорий қилмоқда — бу гал криптовалюта майдонида. Улар АҚШда World (WLD) номли криптовалюта савдосини бошлаб юборди.

Энг қизиғи — бу криптовалютани пулга эмас, балки кўз гавҳарини сканерлатиш орқали олиш мумкин. Яъни сиз махсус Orb қурилмаси ёрдамида ўз кўзингизни скан қилдирсангиз, ноёб hash-код орқали инсон эканлигингиз тасдиқланади. Бу код World ID профилида сақланади ва сизнинг сунъий интеллект эмас, айнан реал инсон эканлигингизни исботлайди.

Бу ташаббуснинг илк номи — Worldcoin эди. Лойиҳа ташаббускорларининг айтишича, уларнинг мақсади жуда оддий ва шу билан бирга замонавий муаммога тўғри жавоб: интернет оламида инсон билан алгоритмни фарқлаш тобора мушкуллашиб бораётган бир пайтда, ишончли аутентификация тизими зарур.

World лойиҳаси муаллифлари бу тизимнинг келажагига ишонади. Улар буни нафақат шахсни аниқлаш, балки мобил тўловлар, идентификация, хавфсизлик ва турли онлайн платформаларда фойдаланиш имконини берувчи восита сифатида кўришмоқда. Яқин кунларда Visa дебет картаси орқали WLD криптовалютасини анъанавий пулга айлантириш имконияти яратилиши кутилмоқда.

Бугунги кунда Telegram, Discord, Shopify ва бошқа йирик онлайн майдонлар ҳам World ID орқали тасдиқлаш имконини бермоқда. Бу эса айнан сунъий интеллектдан инсонни ажратиш керак бўлган ҳолатларда жуда муҳим.

Кўз гавҳарини скан қилиш учун икки хил ускуна ишлатилади:

• Orb — кўпкамерали, металл корпусли махсус қурилма;
  
• Orb Mini — смартфонга ўхшаш, қўлда тутиб ишлатишга мўлжалланган гаджет.
  

Иккаласи ҳам IrisCode деб номланган ноёб идентификаторни яратиб, глобал маълумотлар базасида сақлайди. Бу код сизга ягона инсон сифатида кибермаконда ўзингизни таништиришга ёрдам беради.

Таъкидланишича, бу ғоя баҳсли қарашларга сабаб бўлган. Аммо лоҳага аллақачон 26 миллиондан ортиқ киши рўйхатдан ўтган, шундан 12 миллиони ўз шахсини тасдиқлаган.

World лойиҳаси асосан ривожланаётган давлатларга йўналтирилган. Технология ҳам айнан шу бозорларда синаб кўрилган ва у ерда жамоаларнинг қизиқиши юқори экани айтилмоқда.

Қизиқ, сиз кўзингизни скан қилдириб крипто олишга тайёрмисиз? «Замин»ни Telegram’да ўқинг!