OpenAI корпоратив сунъий интеллект бозорида етакчиликни қўлга киритди

Сўнгги йилларда дунё бўйича сунъий интеллектга бўлган талаб жадал суръатларда ўсиб бормоқда. Айниқса, корпоратив секторда сунъий интеллект ечимлари энг юқори талабга эга бўлган технологиялардан бирига айланди. Шу соҳада эса OpenAI компанияси ўзининг рақобатчиларидан сезиларли даражада олдинлаб кетмоқда.

Америкадаги машҳур финтех компанияси Ramp AI Index томонидан чоп этилган сўнгги маълумотларга кўра, OpenAI корпоратив сунъий интеллект бозорида ўзининг устунлигини янада мустаҳкамлади. 2025 йил апрель ойи ҳолатига кўра, АҚШ компанияларининг 32,4 фоизи айнан OpenAI сунъий интеллект воситалари ва хизматларидан фойдаланмоқда. Январь ойида эса бу кўрсаткич 18,9 фоизни ташкил этган эди. Бунинг ўзи ҳам компания қисқа вақт ичида мижозлар сонини анча кўпайтирганини кўрсатади.

Бироқ, OpenAI'нинг энг яқин рақобатчилари мазкур соҳада анча ортда қолмоқда. Хусусан, Anthropic компаниясининг сунъий интеллект маҳсулотларидан фойдаланаётган ташкилотлар сони атиги 8 фоизни ташкил қилмоқда. Эътиборли томони, Google AI маҳсулотлари обунаси эса анча пасайиб, бор-йўғи 0,1 фоизгача тушиб кетган.

Ramp AI таҳлилчилари фикрига кўра, OpenAI сунъий интеллект соҳасидаги ўсиб бораётган бозорнинг энг фаол ва истиқболли иштирокчиси ҳисобланади. Айни пайтда OpenAI сунъий интеллект технологиялари асосида компанияларнинг бизнес жараёнларини оптималлаштириш ва янги маҳсулотлар яратиш учун хизмат қилувчи махсус корпоратив агентлар ишлаб чиқишни режалаштирмоқда.

Компаниянинг келажакдаги молиявий кўрсаткичлари ҳам катта ўсишни ваъда қилмоқда. Жумладан, 2025 йил учун прогноз қилинаётган даромад миқдори 12,7 миллиард долларга тенг бўлса, 2026 йилга келиб бу рақам 29,4 миллиард долларга етиши кутилмоқда. Мазкур рақамлар OpenAI'нинг бозордаги нуфузини янада мустаҳкамлашини ва янги лойиҳалар билан ўз мавқеини кенгайтиришини кўрсатади.

Шунга қарамай, Ramp компанияси келтирган рақамлар бозорнинг тўлиқ кўринишини акс эттирмаслиги мумкин. Чунки тадқиқот атиги 30 000 компаниянинг кўрсаткичларига асосланган. Аммо бу ҳам аниқки, тенденциялар OpenAI корпоратив AI сегментида аниқ ва шубҳасиз етакчилик қилаётганини тасдиқлайди.

Бугунги кунда OpenAI сунъий интеллект соҳасида нафақат маҳсулотлари билан, балки янги стандартлар ўрнатиш билан ҳам корпоратив дунёда чинакам инқилоб ясамоқда. Компания бу борада ўз рақобатчилари учун ҳам етиш қийин бўлган юқори даражадаги меъёрларни шакллантирмоқда.

OpenAI корпоратив сунъий интеллект бозорининг етакчисига айланди: рақобатчилар учун бу беллашув қандай якунланади? «Замин»ни Telegram’да ўқинг!