Американалик ўсмирнинг фожиали ўлимидан сўнг, ОпенАИ ўз чат-ботида хавфсизлик чораларини сезиларли даражада кучайтиришга қарор қилди. Bloomberg хабарига кўра, эндиликда ота-оналар фарзандларининг ЧатГПТ орқали мулоқотини тўлиқ назорат қилиш имкониятига эга бўлади.
Калифорнияда яшовчи 16 ёшли мактаб ўқувчиси Адам Рейн жорий йил апрель ойида ўз жонига қасд қилган эди. Унинг ота-онаси бу фожиани чат-бот билан боғлаб, ОпенАИ компанияси ва бош директори Сем Алтманга қарши судга даъво билан мурожаат қилган. Улар фикрича, сунъий интеллект асосидаги дастур фарзандларини оиласидан узоқлаштириши мумкин ва ҳатто ёшларга ўз жонига қасд қилиш режаларини тузишда маълум ёрдам бериш эҳтимоли бор.
Марҳумнинг ота-онаси суд ҳужжатларида шундай дейди:
“Чат-бот Адам учун энг яқин суҳбатдошга айланди. У ўзининг қўрқувлари ва руҳий ҳолатини айнан ЧатГПТ билан бўлишар эди. Кейинчалик дастур унга ўз жонига қасд қилиш йўллари ҳақида маълумот берган ва бу ҳолатдан қайтаришга ҳаракат қилинмаган”.
Бу фожиали воқеадан сўнг ОпенАИ ота-оналарнинг фарзандлари фаолиятини тўлиқ кўриб бориш имконини берадиган янги назорат тизимини ишлаб чиқишга ваъда берди. Яқин вақтларда ота-оналар ЧатГПТда фарзандларининг барча сўровлари ва мулоқотини кузатиши мумкин бўлади.
Шунингдек, компания фойдаланувчилар учун лицензияга эга психологлар тармоғини ташкил қилишни ҳам режалаштирмоқда. Бу орқали ёшлар чат-бот орқали профессионал ёрдам олиши мумкин ва руҳий саломатлик билан боғлиқ масалаларда ишончли маслаҳат олиши таъминланади.
Мутасаддилар таъкидлашича, бу қўшимча хавфсизлик ва қўллаб-қувватлаш чоралари болалар ва ўсмирлар учун онлайн муҳитдаги хавфларни сезиларли даражада камайтиради. Шу тариқа, чат-ботлардан фойдаланишда ота-оналар ва мутахассислар ҳамкорлиги аҳамиятли бўлиб қолади.
«Замин»ни Telegram’да ўқинг!
