Трампнинг блокланган аккаунти учун YouTube 24,5 млн доллар товон тўлайди

Associated Press хабарига кўра, YouTube АҚШ президенти Доналд Трампнинг аккаунти блоклангани билан боғлиқ суд даъвосини ҳал қилиш учун 24,5 миллион доллар тўлайди.

Битимга кўра, 22 миллион доллар “Trust for the Nation Mall” ташкилотига — Оқ уйда бал зали қурилиши учун йўналтирилади. Қолган маблағ эса ишда иштирок этган даъвогарлар, жумладан, ёзувчи Наоми Вулф ва Америка консерватив иттифоқига тақсимланади.

YouTube’нинг эгаси Alphabet корпорацияси Трамп билан келишувга борган учинчи йирик IT-компанияга айланди. Январ ойида Meta Platforms 25 млн доллар, X (собиқ Twitter) эса 10 млн доллар тўлаб суд ишини якунлаган эди.

Маълумот учун: Трампнинг Facebook, Instagram, YouTube ва Twitter аккаунтлари 2021 йил 6 январь воқеаларидан сўнг вақтинча блокланган. Шунда унинг тарафдорлари сайлов натижаларига қарши чиқиб, Капитолий биносига бостириб кирган, ижтимоий тармоқлар эса Трампнинг постларини мазкур ҳаракатни қўллаб-қувватловчи деб баҳолаган.

Nigina Zarqarayeva

«ZAMIN.UZ» муҳаррири