MacRumors нашрининг инсайдер маълумотларига кўра, Apple келаси йили тақдим этадиган iPhone 18 Pro ва iPhone 18 Pro Max моделлари сезиларли даражада янгиланган ҳолда намоён бўлади. Компания ташқи кўринишда севимли классик дизайнини сақлаб қолади, аммо корпус ичи ва камера тизимида жиддий инқилоб кутилмоқда.
2022 йилдан бери илк марта Apple экрандаги «оролча»ни кичрайтиришга қарор қилган. Бу ўзгариш компаниянинг тўлиқ рамкасиз ва тешиксиз дисплейга ўтиш йўлидаги илк ҳаракати сифатида баҳоланмоқда. Аммо олд камера ҳали ҳам кўриниб туради — экран остидаги Face ID фақат iPhone 19 Pro да пайдо бўлиши мумкин.
Янги моделнинг яна бир қизиқ жиҳати — орқа панел дизайни. Унда магнит ҳалқа қисми орқали хира шаффоф эффект жорий этилади, бу орқали фойдаланувчи смартфон ичидаги қисмларни яққол кўра олади. Шу билан бирга, экран диагонали ўзгармасдан қолади: iPhone 18 Pro — 6,3 дюйм, Pro Max — 6,9 дюйм.
Камера тизимидаги янгиликлар ҳам эътиборга лойиқ. Асосий 48 мегапикселли сенсор эндиликда ўзгарувчан диафрагмани қўллаб-қувватлайди. Бу дегани, фойдаланувчи ёруғлик даражасини қўлда бошқариши ва турли шароитларда фотосурат сифатини яхшилаши мумкин бўлади. Айни вақтда бундай имконият ҳали ҳеч бир iPhone моделида мавжуд эмас.
Қурилмадаги A20 Pro чипи эса 2-нм TSMC технологик жараёни асосида ишлаб чиқарилади. Бу унинг унумдорлигини анча оширади ва энергия тежамкорлигини ҳам кучайтиради.
Инсайдерлар таъкидлашича, 2026 йилдан бошлаб Apple янги тақдимот тизимига ўтади — Pro моделлар ва букланадиган iPhone кузда намойиш этилади, арзонроқ версия эса баҳорда бозорга чиқади.
Букланадиган iPhone ҳақида ҳам маълумотлар бор. Манбаларнинг ёзишича, у Galaxy Z Fold услубидаги китобсимон дизайнга эга бўлади, бурмасиз экран, Touch ID тизими ва тўртта камера билан жиҳозланади.
Якунда айтганда, iPhone 18 серияси Apple учун навбатдаги босқич — дизайн, функционал ва технология жиҳатидан янги давр бошланиши бўлиши кутилмоқда.
“Zamin”ни Telegram'да ўқинг!
