Снап компанияси ўзининг чораклик молиявий ҳисоботида Perplexity билан тузилган 400 миллион долларлик шартнома якунланганини маълум қилди. Ўтган йилнинг ноябрь ойида эълон қилинган ушбу келишувга кўра, Perplexity сунъий интеллектга асосланган қидирув тизимини Snapchat иловасига интеграция қилиши керак эди. Бу ҳақда Techcrunch.com хабар беради.
Компания вакилларининг таъкидлашича, томонлар ҳамкорликни жорий йилнинг биринчи чорагида «дўстона тарзда» тўхтатишга қарор қилишган. Дастлабки режага кўра, Perplexity бир йил давомида Снапга нақд пул ва акциялар кўринишида 400 миллион доллар тўлаши ва 2026-йилдан бошлаб даромад келтириши кутилаётган эди.
Snapchat фойдаланувчилари ушбу интеграция орқали илова ичида саволлар бериб, сунъий интеллект ёрдамида жавоблар олиши кўзда тутилган эди. Бироқ, синов жараёнларидан сўнг томонлар лойиҳани кенг кўламда жорий этиш бўйича якуний келишувга эриша олмадилар.
Шунга қарамай, Снап ўзининг глобал фаол фойдаланувчилари сони 5 фоизга ўсиб, 483 миллионга етганини қайд этди. Компания раҳбари Эван Спиегель сунъий интеллект ва ақлли кўзойнаклар технологияларига инвестиция киритишда давом этишини ҳамда келажакда бошқа инновацион ҳамкорлар билан ишлашга тайёрлигини билдирди.
“Zamin”ни Telegram'да ўқинг!
