АҚШ Миллий йўл ҳаракати хавфсизлиги бошқармаси (НҲТСА) Uber билан ҳамкорлик қилувчи роботакси ишлаб чиқарувчи Авриде компаниясига нисбатан тергов бошлади. Бунга компания автомобиллари иштирокида содир бўлган 16 та йўл-транспорт ҳодисаси ва бир кишининг енгил тан жароҳати олгани сабаб бўлган. Бу ҳақда Techcrunch.com хабар беради.
Тергов маълумотларига кўра, авариялар Авриде тизимининг қатор камчиликлари билан боғлиқ. Хусусан, автомобиллар йўлакни ўзгартириш, бир йўлакдаги бошқа транспорт воситаларига муносабат билдириш ҳамда йўлда тўхтаб турган объектларни аниқлашда қийналган. Қизиғи шундаки, барча ҳодисалар вақтида ҳайдовчи ўриндиғида хавфсизлик назоратчиси бўлган, бироқ улар нима учун аралашмагани ҳозирча номаълум.
Авриде компанияси барча ҳодисалар ҳақида НҲТСАга ўз вақтида хабар берганини таъкидлади. Компания вакилларининг сўзларига кўра, 2025-йил декабридан 2026-йил мартигача бўлган даврда юз берган ҳар бир ҳолат таҳлил қилиниб, тизимда техник ва операцион яхшиланишлар амалга оширилган. Шунингдек, компания босиб ўтилган масофага нисбатан авариялар сони камайиб бораётганини қайд этди.
Даллас ва Остин шаҳарларида кузатилган ушбу ҳодисалар автоном технологияларнинг хавфсизлиги борасида жиддий саволларни келтириб чиқармоқда. Ҳозирда Ваймо компанияси ҳам шунга ўхшаш текширувлар остида қолган. Uber эса мазкур вазият юзасидан ҳозирча расмий изоҳ бермади.
“Zamin”ни Telegram'да ўқинг!
