Канвас таълим платформаси ишлаб чиқарувчиси Инструктуре компанияси ўз тизимларига икки марта ҳужум қилган хакерлар билан келишувга эришганини маълум қилди. ШинйҲунтерс кибержиноятчилар гуруҳи 29-апрель куни содир этилган ҳужум учун жавобгарликни ўз зиммасига олиб, 275 миллионга яқин ўқувчи ва ходимнинг шахсий маълумотларини ўғирлаганини даъво қилган эди. Бу ҳақда Techcrunch.com хабар беради.
Ўтган ҳафта хакерлар компанияга босим ўтказиш мақсадида Канвас тизимига иккинчи бор ҳужум қилиб, мактаб веб-сайтларидаги кириш саҳифаларини бузиб қўйишди. Инструктуре компанияси хакерлар ўғирланган маълумотларни йўқ қилганликлари ҳақида далил тақдим этганини ва мижозлар энди шантаж қилинмаслигини билдирди.
Компания кибержиноятчилар билан музокара олиб боришда тўлиқ кафолат бўлмаслигини тан олган бўлса-да, келишувнинг молиявий шартлари ошкор этилмади. Инструктуре вакиллари тўлов амалга оширилганми ёки йўқми, деган саволларга жавоб беришдан бош тортди.
АҚШ ҳукумати ва хавфсизлик бўйича экспертлар кибержиноятчиларга тўлов қилмасликни тавсия қилади, чунки бу уларнинг фаолиятини рағбатлантиради. Мутахассисларнинг фикрича, хакерлар маълумотларни ўчирганликларини даъво қилсалар ҳам, уларга тўлиқ ишониб бўлмайди ва улар келажакда яна шантаж қилишда давом этишлари мумкин.
“Zamin”ни Telegram'да ўқинг!
