Дания компанияси Каделер Шимолий денгизда жойлашган Ҳорнсеа 3 денгиз шамол электр станцияси учун биринчи пойдеворни ўрнатганини маълум қилди. Орстед энергетика компанияси томонидан амалга оширилаётган ушбу лойиҳа 2027-йилда ишга тушгач, дунёдаги энг йирик офшор шамол паркига айланади. Бу ҳақда Ixbt.com хабар беради.
Станция Буюк Британия қирғоқларидан, аниқроғи Норфолькдан 120 километр узоқликда барпо этилмоқда. Лойиҳанинг умумий қуввати 2,9 гигаваттни ташкил этади, бу эса 3 миллиондан ортиқ британиялик хонадонни электр энергияси билан таъминлашга етарли бўлади.
Қурувчилар аллақачон биринчи шамол турбинаси учун асосий пойдеворни ўрнатиб бўлишди. Денгиз тубига қоқиладиган улкан пўлат қозиқлар турбиналар учун таянч вазифасини бажаради. Лойиҳа доирасида жами 197 та шундай конструкцияни ўрнатиш режалаштирилган.
Ушбу ишлар учун махсус Винд Аллй кемаси ва бошқа техник воситалардан фойдаланилмоқда. Ҳорнсеа 3 Буюк Британиянинг йирик шамол энергетикаси кластери бўлган Ҳорнсеа Зоне таркибига киради. Мазкур лойиҳа мамлакатнинг «яшил» энергетикага ўтиши ва қазиб олинадиган ёқилғига қарамликни камайтиришида муҳим аҳамият касб этади.
Иқтисодий нуқтаи назардан, лойиҳа қурилиш даврида 5000 га яқин иш ўрнини яратиши кутилмоқда. Станция тўлиқ ишга тушганидан сўнг эса инфратузилмага хизмат кўрсатиш учун яна мингдан ортиқ доимий иш ўрни очилади.
“Zamin”ни Telegram'да ўқинг!
