Nissan Xitoy bozorida yangilangan modellarini taqdim etishda davom etmoqda. Yapon ishlab chiqaruvchisining navbatdagi yangiligi — “supergibrid” deya ta'riflanayotgan X-Trail krossoveri boʻldi.
Nissan Xitoy bozorida X-Trail’ning savdosini boshladi. U ikki xil komplektatsiyada xaridorlarga taklif etilmoqda. Xususan, Deluxe pozitsiyasi 27 000 dollarga baholangan boʻlsa, Supreme komplektatsiyasi uchun 28 350 dollar soʻralmoqda. Ikkala pozitsiya texnik tomondan bir xil, faqatgina qoʻshimcha imkoniyatlar bilan farqlanadi.
“Supergibrid” Nissan X-Trail 2-avlod e-POWER gibrid tizimiga ega boʻlgan. Ichki yonuv dvigateli faqat generator vazifasini bajarib beradi, ya'ni uning mashina gʻildiraklariga umuman aloqasi yoʻq. Shu tomondan X-Trail elektromobilga juda oʻxshab ketadi. Ikkita elektromotor oʻrnatilgan — old va orqada. Ular jami 340 ot kuchini berishga qodir. Avtomobil batareyasini 1,5 litr hajmga ega 144 ot kuchini beradigan turbodvigatel quvvatlab turadi.
Mashinaning uzunligi 4681 mm, eni 1840 mm, boʻyi esa 1730 mm, gʻildiraklar bazasi boʻlsa 2706 mmni tashkil etadi.
Deluxe komplektatsiyasi ham ikkinchi darajali avtopilot bilan ta'minlagan. Bunda haydovchi yoʻl belgilarini avtomatik tanish, yoʻl chizigʻidan chiqib ketmaslik, moslashuvchan kruiz-nazorat, iqlim nazorati, proektsiyali displey funktsiyalaridan foydalanishi mumkin.
Supreme versiyasida mediatizimni 12,3 dyuymlik displey yordamida boshqarish mumkin (Deluxe’da esa 7 dyuymlik displey).
“Zamin” yangiliklarini “Telegram”da kuzatib boring
