Leapmotor elektromobillari atrofidagi shovqin: O‘zbekistonda sertifikat olish to‘xtatildi

Xitoyning elektromobillar ishlab chiqaruvchi Leapmotor brendi O‘zbekistonda texnik cheklovlarga duch keldi. Mamlakatda ushbu brendga tegishli yengil avtomobillarni sertifikatlash jarayoni vaqtincha to‘xtatildi.

S16 modelda aniqlangan jiddiy kamchilik

Nazorat organlari ma’lum qilishicha, Leapmotor S16 avtomobili elektron moslashuvchanlik bo‘yicha testda normalarga javob bermagan. Aniqlanishicha, ushbu avtomobilda hosil bo‘ladigan elektromagnit shovqin darajasi ruxsat etilgan chegaradan 16 barobar yuqori bo‘lgan.

Bu holat Texnik jihatdan tartibga solish sohasida nazorat inspeksiyasining rasmiy bayonoti orqali ma’lum qilindi. Bu kabi kamchiliklar transport vositasining boshqa elektron tizimlariga ta’sir qilishi mumkinligi bois, xavfsizlik nuqtayi nazaridan juda jiddiy baholanmoqda.

Leapmotor'dan rasmiy javob keldi

Holat yuzasidan Leapmotor rasmiy munosabat bildirdi. Kompaniya vakillari quyidagilarni ma’lum qildi:

“O‘zbekistonda tekshiruvdan o‘tkazilgan avtomobil biz tomonimizdan yuborilmagan. Shuningdek, tekshiruv shartlari va tanlangan mashina holati haqida aniq ma’lumotlar mavjud emas. Bizda natijalarga nisbatan e’tirozlar bor. Shu bois, shaffof va qayta tekshiruv o‘tkazilishini xohlaymiz, — deyiladi bayonotda.

Nima bo‘ladi endi?

Leapmotor tomoni vaziyatni rasmiy kanallar orqali hal qilishga, texnik talablarga javob berish bo‘yicha hamkorlik qilishga tayyor ekanini bildirgan. Ayni paytda esa O‘zbekistonda ushbu brend ostidagi yangi mashinalarni rasmiy tarzda ro‘yxatdan o‘tkazish va sertifikatlash jarayoni to‘xtatilgan.

Eslatma:
Leapmotor — Xitoyning so‘nggi yillarda ommalashgan elektromobil brendlaridan biri bo‘lib, dunyoning ko‘plab mamlakatlarida o‘z modellari bilan ishtirok etmoqda. O‘zbekistonda ham mazkur brendga qiziqish ortib borayotgan edi.

Sizningcha, elektron shovqin kabi kamchiliklar elektromobillar ishonchini pasaytiradimi?

Fikringizni izohda qoldiring! Zamin.uz yangiliklarni kuzatib boradi.