1 iyundan haydovchilar uchun ballli jazo tizimi joriy etiladi – 12 ball to‘plansa, guvohnomadan ayrilishi mumkin

O‘zbekistonda yo‘l harakatidagi intizomni oshirish, haydovchilarning qonunga itoatkorligini mustahkamlash maqsadida yangi tartib joriy etilmoqda. Vazirlar Mahkamasining 6 may kuni qabul qilgan qaroriga asosan, 1 iyundan boshlab haydovchilar uchun “jarima balli” baholash tizimi amalga kiritiladi.

Balllar faqat YPX xodimlari tomonidan rasmiylashtirilgan jarimalarga asosan hisoblanadi

Yangi tartibga ko‘ra, haydovchiga nisbatan jarima ballari faqat Yo‘l-patrul xizmati xodimlari tomonidan rasmiylashtirilgan qoidabuzarliklar uchun belgilanadi. Bu jarayon to‘liq E-jarima elektron moduli orqali, inson omilisiz, avtomatik ravishda yuritiladi.

Avtomatik kameralar orqali qayd etilgan qoidabuzarliklar uchun hozircha ball berilmaydi. Bu borada Hukumatga alohida xulosa taqdim etish Ichki ishlar vazirligi zimmasiga yuklatilgan.

Qonunbuzarlik qilmagan haydovchi rag‘batlantiriladi

Tartibda haydovchilarni intizomga chaqirish bilan birga, rag‘batlantiruvchi mexanizmlar ham nazarda tutilgan. Xususan: Agar haydovchi 12 oy davomida biror qoidabuzarlik qilmasa, keyingi davrda birinchi martagi qoidabuzarlik uchun ball yozilmaydi.

Agar haydovchiga ball yozilganidan keyin 6 oy mobaynida boshqa qoidabuzarlikka yo‘l qo‘ymasa, 2 ball uning hisobidan avtomatik ravishda olib tashlanadi.

12 ball — sudga avtomatik murojaat va haydovchilik huquqidan mahrum etish

Eng muhim o‘zgarishlardan biri — ballar yig‘ilishi bilan bog‘liq jazo choralari. Agar haydovchi 12 oy ichida 12 ball to‘plasa, u holda:

- Ma’lumotlar avtomatik tarzda sudga yuboriladi,
- Inson omili aralashmaydi,
- Haydovchiga SMS orqali ogohlantirish yuboriladi.

Qonunga asosan, sud bunday haydovchilarni 6 oydan 3 yilgacha bo‘lgan muddatga haydovchilik guvohnomasidan mahrum etishi mumkin.

Zamin.uz tahririyati ushbu tizimning joriy etilishi haydovchilar orasida qonunga rioya qilish madaniyatini oshirishga xizmat qilishi, yo‘llarda xavfsizlikni ta’minlash va inson omilisiz elektron nazorat orqali shaffoflikni ta’minlashda muhim qadam ekanini ta’kidlaydi.


“Zamin”ni Telegramʻda oʻqing!