O‘zbekistonda avtotransport vositalarining ekologik toifalarini aniqlash va ularga maxsus eko-stikerlar berish tartibi rasman belgilandi. Hukumat qaroriga muvofiq, endilikda mashinalardan chiqadigan ifloslantiruvchi moddalar me’yorga mosligi tekshirilib, ularning ekologik sinfiga qarab toifa beriladi.
Nizomga ko‘ra, har bir transport vositasining eko-tufi uni ishlab chiqaruvchi tomonidan tasdiqlangan ekologik sinfiga asosan belgilanadi. Kategoriyalar benzin, gaz va dizelda harakatlanuvchi mashinalar uchun alohida tarzda ajratilgan:
Benzin va gazda yuradigan avtomashinalar:
— “Yevro-2” va undan yuqori — “toza” toifa;
— “Yevro-0” va “Yevro-1” — “o‘rta” toifa.
Dizel yoqilg‘isida harakatlanuvchilar:
— “Yevro-4” va undan yuqori — “toza” toifa;
— “Yevro-3” — “o‘rta” toifa;
— “Yevro-0”, “Yevro-1”, “Yevro-2” — “zararli” toifa.
Gibrid avtomobillar, muqobil yoqilg‘i qo‘llovchi transport vositalari va ishlab chiqarilganiga 3-yil to‘lmagan mashinalar avtomatik ravishda “toza” toifaga kiritiladi.
Ekologik stikerlar — yashil, sariq yoki qizil ranglarda bo‘lib, transportni ro‘yxatga olish yoki qayta ro‘yxatdan o‘tkazish vaqtida Davlat yo‘l harakati xavfsizligi bo‘linmalarida ekologiya operatorlari tomonidan beriladi. Ularni ixtiyoriy tarzda olishni istaganlar IIV Jamoat xavfsizligi departamentining rasmiy sayti yoki my.gov.uz orqali murojaat qilishi mumkin. Ariza talablarga mos kelsa, stiker muddatsiz beriladi.
Yangi grafikga ko‘ra, Toshkent shahrida ekostikerlar 2026-yil yanvaridan tarqatilib boshlanadi. Poytaxtdagi barcha transport vositalarini ekologik baholash muddati 2027-yildan 2028-yil boshigacha uzaytirildi. Nukus va viloyat markazlarida esa baholash jarayoni 2031-yil yanvar oyigacha amal qiladi. Qolgan hududlarda avtomashinalarni atrof-muhit toifalariga ajratishning oxirgi muddati 2035-yil boshigacha belgilandi.
Eslatib o‘tamiz, 2024-yil mart oyida qabul qilingan qarorga ko‘ra, ekostikerlar tizimi iyundan amalga tushishi kerak edi. Biroq keyinroq bu muddat 2025-yil 1-martiga ko‘chirilgan, endi esa yana yangilangan tartib bo‘yicha amal qiladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
