Avtotransportdan foydalanishda qarindoshga ishonchnoma berishni bekor qilish uchun 13 ming kishi ovoz berdi

Avtotransport vositasidan foydalanishda yaqin qarindoshlar uchun ishonchnoma olish tizimini bekor qilish haqidagi onlayn-petitsiya 13 mingdan ortiq ovoz to‘pladi. Mazkur petitsiya oktyabrda «Mening fikrim» jamoaviy murojaatlar portaliga joylashtirilgan edi.

Murojaat muallifi Amirbek Kenjayevning qayd etishicha, bunday ishonchnomani notarius orqali rasmiylashtirish ko‘p vaqt va oilaviy oilaviy byudjet puli talab qilinadi. «Begona odamlarga ishonchnoma berishni tushunish mumkindir, lekin ota-ona bolasi, aka-uka, opa-singil bir-biriga ishonchnoma berishi, ochig‘ini aytsak qadriyatlarimizga ham, mentalitetimizga ham to‘g‘ri kelmaydi», — deb yozadi u.

«1990-yillarda mashina o‘g‘irlash bilan bog‘liq voqealar ko‘p edi. Balki o‘sha paytda bu tizim o‘zini oqlagandir. Lekin hozirgiday yurtimiz innovatsion jihatdan rivojlanib borayotgan, „Xavfsiz shahar“ tizimi ishga tushirilgan, yo‘llarimizda videokameralar ishlab turgan paytda bunaqa ishonchnoma berish tartibiga zarurat bormikan?» — deya savol beradi muallif.

Murojaat ayni vaqtda «Ko‘rib chiqish jarayonida» maqomida. Portal qoidalariga ko‘ra, murojaatni O‘zbekiston Oliy Majlisi ko‘rib chiqishi uchun u eng kamida 10 ming ovoz to‘plashi lozim. Petitsiyani ko‘rib chiqish va qaror qabul qilish muddati — 60 kundan oshmasligi kerak. Mazkur murojaatga ovoz berish muddati esa 12 kundan so‘ng tugaydi. “Zamin” yangiliklarini “Vkontakti”da kuzatib boring