Shavkat Mirziyoyev avtokredit berayotgan banklarni rag‘batlantirish bo‘yicha ko‘rsatma berdi

Prezident Shavkat Mirziyoyev raisligida 16 aprel kuni kimyo, agrotexnika va avtomobil sanoati korxonalarida ishlab chiqarish sur’atlarini ta’minlash hamda yangi loyihalarni amalga oshirish masalalari bo‘yicha videoselektor yig‘ilishi bo‘lib o‘tdi.

Butun dunyoda pandemiyadan eng katta zarar ko‘rgan tarmoqlardan biri avtomobilsozlik bo‘lmoqda. Bunday sharoitda korxonalarning barqaror ishlashini ta’minlash uchun, avvalo, ichki bozor imkoniyatlaridan to‘liq foydalanish zarur.

Masalan, O‘zbekistonda ehtiyot va butlovchi qismlar bozori 500 million dollarni tashkil etadi. Mahalliy mahsulotlarning undagi ulushi – atigi 9 foiz. «O‘zavtosanoat»ga 2020 yil yakuniga qadar 300 turdagi import butlovchi qismlarni o‘zlashtirib, xorijnikidek sifatli ishlab chiqarish vazifasi qo‘yildi.

Avtomobillarning yangi modellarini ishlab chiqish, avtokredit berayotgan tijorat banklarini rag‘batlantirish bo‘yicha ko‘rsatmalar berildi, deya xabar bermoqda Prezident matbuot xizmati.

«SamAvto» va MAN zavodlarida maxsus texnikalar ishlab chiqarishni kengaytirish, agrar tarmoqda talab kuzatilayotgan yangi turlarni o‘zlashtirish yaxshi samara berishi ta’kidlandi.

Avtosanoat mahsulotlari eksportini oshirish masalasiga ham to‘xtalib o‘tildi. Ishlab chiqarishdan tortib, savdo va servis xizmatigacha bo‘lgan barcha jarayonlarni raqamlashtirish orqali sifatni nazorat qilish, mahsulotga ishonchni oshirish, ochiq-oshkoralikni ta’minlash muhimligi qayd etildi. “Zamin” yangiliklarini “Facebook”da kuzatib boring