Mozori Sharifda sodir etilgan portlashlar oqibatida 9 kishi halok boʻldi

^{Foto: Khaama Press}
Afgʻonistonning Balx viloyati markazi Mozori Sharifda 28 aprel oqshomida sodir etilgan ikkita portlash oqibatida kamida 9 kishi halok boʻldi, 13 kishi jarohatlandi. Teraktlar uchun javobgarlikni IShIDning Afgʻonistondagi boʻlinmasi zimmasiga oldi. Terrorchilarning oʻzi portlashlarda 30 kishi jarohatlanganini ma'lum qilgan, deb xabar bermoqda Khaama Press nashri.

Hujumlar nishoni jamoat transporti boʻlgan. Balx politsiyasi va xavfsizlik boshqarmasi ma'lumotlariga koʻra, mikroavtobuslarga portlovchi moddalar oʻrnatilgan. Hodisa yoʻlovchilar iftorlik qilish uchun uylariga shoshilayotgan bir vaqtda sodir boʻlgan. Shahar politsiyasi matbuot kotibi Asif Vaziriyning fikricha, hujumlar nishoni shialar boʻlgan boʻlishi mumkin.

Bir hafta avval, 21 aprel kuni IShID terrorchilari Mozori Sharifdagi shialar masjidiga hujum qilgan edi. Jabrlanganlar soni turlicha: mahalliy manbalar 30 dan ortiq odam halok boʻlgani va 90 ga yaqini yarador boʻlganini aytgan, «Tolibon» vakillarining bayonotida esa qurbonlar soni kamroq.

22 aprel kuni Qunduz shahridagi masjidda sodir boʻlgan portlash oqibatida kamida 33 kishi halok boʻlgandi, yana 43 kishi jarohat olgan. “Zamin” yangiliklarini “Telegram”da kuzatib boring