Primoreda ikki deputat Putindan qo‘shinlarni Ukrainadan olib chiqishni talab qildi

^{Primore o‘lkasi ma’muriyati binosi. Foto: YURI SMITYUK/TASS}
Primore o‘lkasi qonun chiqaruvchii organi yig‘ilishida kommunistik partiyaning (KPRF) ikki deputati urushga qarshi fikr bildirdi. Shundan keyin ularni ovoz berish huquqidan mahrum etishdi, partiyada esa ularga nisbatan «eng qat’iy choralar» ko‘rilishi va’da qilindi. Bu KPRF a’zolarining partiyaning Ukrainaga bosqinni ma’qullovchi rasmiy liniyasiga qo‘shilmasligi bilan bog‘liq ilk holat emas.

Kun tartibidagi masalalar muhokama qilinayotgan bir vaqtda KPRF fraksiyasi a’zosi Leonid Vasyukevich so‘z olgan va kutilmaganda Rossiya prezidentiga murojaatini o‘qib berishni boshlagan, unda Ukraina hududidan zudlik bilan qo‘shinlarni olib ketish talabi bayon etilgan. Uning chiqishidan parchalarni PrimaMedia nashri e’lon qildi.

«Yetimlar yanada ko‘p bo‘ladi»
Vl.ru nashri xabar berishicha, Vasyukevichning mikrofonini darhol uzib qo‘yishgan, ammo jurnalistlar uning so‘zlarini aniqlay olishgan: «Biz tushunib turibmizki, agar mamlakatimiz harbiy amaliyotni to‘xtatmasa, yetimlar yanada ko‘proq bo‘ladi. Harbiy amaliyot davomida odamlar nogiron bo‘lib qolishmoqda, bular mamlakatimizga katta foyda keltirishi mumkin bo‘lgan yoshlardir».

«Biz Rossiya Federatsiyasi qo‘shinlarini zudlik bilan olib chiqishni talab qilamiz», degan deputat.

Chiqishi so‘nggida Vasyukevich murojaatga imzo qo‘ygan to‘rt nafar deputatning familiyasini sanagan. Ulardan ikkisi - Natalya Kochugova va Aleksandr Sustov - darhol bu ishni qilmaganliklarini aytishgan.

Yana biri - Gennadiy Shulga esa nutq yakunida partiyadoshini olqishlagan.

Yig‘ilishda deputatlar qarshisida yillik hisobot bilan chiqish qilishi kerak bo‘lgan o‘lka gubernatori Oleg Kojemyako esa Vasyukevich va Shulgani so‘z olish huquqidan mahrum etib, zaldan chiqarib yuborishni talab qilgan.

«Bu harakatlar Rossiya armiyasi va natsizmga qarshi kurashayotgan himoyachilarimizni obro‘sizlantiradi. Sotqin», deya Kojemyakoda iqtibos keltiradi «Kommersant» gazetasi.

Yakunda 45 deputatdan 25 nafari Vasyukevich va Shulgani yig‘ilishda ovoz berish huquqidan mahrum etishni yoqlab ovoz bergan.

Partiyaning reaksiyasi
Kommunistik partiyaning Primore qonun chiqaruvchi organidagi fraksiyasi yetakchisi Anatoliy Dolgachev hamkasblarini himoya qilmadi va ularning harakatini «mutlaqo demarsh» deb atadi.

«O‘ylaymanki, biz sizning harakatlaringizga siyosiy baho beramiz. Ayniqsa, partiya a’zosi bo‘lganlarga nisbatan eng qattiq choralarni ko‘ramiz. Siz bu kabi bayonotlaringiz bilan KPRF sha’nini yomonotliq qilmoqdasiz», degan u.

KPRF Donbassdagi o‘zini o‘zi mustaqil deb e’lon qilgan respublikalarni qo‘llab-quvvatlagani bilan ma’lum. Shu yil yanvarida aynan kommunistlar prezidentga ushbu respublikalar mustaqilligini tan olishni so‘rab, murojaat qilgandi.

Rossiyaning Ukrainaga bosqini Putin Donbassdagi o‘zini o‘zi mustaqil deb e’lon qilgan respublikalar mustaqilligi tan olinishi, Rossiya ularni Ukrainaning Donetsk va Lugansk oblastlari chegaralarida tan olishini e’lon qilishi ortidan boshlangandi.

Bu deputatlar birinchisi emas
Ayrim kommunist deputatlar avval ham Rossiya bosqiniga qarshi chiqishgan. 28 fevral kuni Komi davlat kengashidagi KPRF fraksiyasi yetakchisi Viktor Vorobev urushni qoralagan (shundan keyin ko‘p o‘tmay u «inoagentlar» reyestriga kiritilgan). «Ukrainada sodir bo‘layotgan voqealar xalqaro huquq bo‘yicha hech qanday asosga ega emas», deya yozgandi Vorobev telegram-kanalida.

Hududiy parlamentning etika bo‘yicha komissiyasi uning ustidan prokuraturaga shikoyat qilgan, spiker Sergey Usachev esa Kommunistik partiya rahbari Gennadiy Zyuganovdan «ochiqdan ochiq g‘arbparast qarashlarni targ‘ib qiluvchi» Vorobev bilan bog‘liq «murakkab vaziyat bilan shug‘ullanish»ni so‘ragandi. KPRF yetakchisi uning bu murojaatiga qanday munosabat bildirgani ma’lum emas.

Voronej oblasti Semilukskiy rayon kengashining KPRF vakili bo‘lgan Nina Belyayevani fraksiyadan o‘chirmoqchi bo‘lishgandi. U Ukrainada asirga tushish - «askar uchun rahbariyat majburlayotgan harakatlarda ishtirok etmaslikning yo‘llaridan biri ekani»ni aytgandi. Uning hamkasblari ham Belyayevaning so‘zlari bo‘yicha prokuraturaga murojaat qilishgan.

Vladivostokda shahar dumasi deputati (u ham kommunistlar partiyasidan) Viktor Kamenshchikov fevral oyi oxirida partiyadan chiqishga ariza yozgan va Ukrainadagi bosqin tufayli deputatlik mandatini topshirishga tayyor ekanini aytgandi. «Men urushga qat’iy qarshima», deya uning so‘zlarini keltirgan Kommersan». May oyida Kamenshchikov Meksika va AQSH chegarasida qo‘lga tushgani ma’lum bo‘ldi - bu haqda mahalliy va federal nashrlar o‘z manbalariga tayangan holda xabar tarqatdi. PrimaMedia suhbatdoshining aytishicha, Kamenshchikovning Amerikada tug‘ilgan farzandi bor. “Zamin” yangiliklarini “Twitter”da kuzatib boring