Bishkekda Kampirobod suv omborining Oʻzbekistonga berilishiga qarshi namoyishlar boʻlib oʻtdi

^{Skrinshot: YouTube}
Bishkekda Kampirobod suv omborining berib yuborilishiga qarshi tinch namoyishlar boʻlib oʻtdi. Marsh ishtirokchilari Ala-Too maydonigacha yurib borib, u erda suv omborining berilishiga qarshi petitsiyani imzoladi. Bu haqda «24.kg» xabar bermoqda.

Miting chogʻida ishtirokchilar suv omborini Oʻzbekistonga berish haqidagi qarorni bekor qilishga da'vat etuvchi shiorlar tushirilgan plakatlarni koʻtarib olgan. Yigʻilganlar, shuningdek, avvalroq qoʻlga olingan faollarni ozod etishni va siyosiy ta'qiblarni toʻxtatishni talab qilgan.

«Kampirobod bizniki, repressiyalar toʻxtasin!» — degan ishtirokchilar.

Namoyishchilarning asosiy talablari quyidagilardan iborat boʻldi:

• Kampirobod suv ombori va uning hududi Qirgʻiziston balansida qolishi kerak.
  
• Kampirobod suv omborini ayirboshlash, delimitatsiya va demarkatsiya qilish boʻyicha masalalar va ishlar toʻxtatilishi kerak. Bitim ratifikatsiya qilinmasligi kerak.
  
• Delimitatsiya va demarkatsiya masalalari boʻyicha davlat komissiyasi qaytadan tuzilishi kerak.
  
• Delimitatsiya va demarkatsiya masalalari boʻyicha protokollar inventarizatsiya qilinishi kerak va jamoatchilik uchun e'lon qilinishi shart.
  
• Siyosiy ta'qiblar zudlik bilan toʻxtatilishi kerak.

Hujjat prezident ma'muriyatiga, Jogorku Keneshga va vazirlar mahkamasiga taqdim etilishi rejalashtirilmoqda. Ta'kidlanishicha, aktsiyada 200 dan 300 nafargacha odam qatnashgan.

2022 yil 22 oktyabr kuni Kampirobod suv omborini qoʻllab-quvvatlovchi qoʻmita tuzilgandi, unga faollar, siyosatchilar va parlament deputatlari kirgan. Oʻsha kuniyoq prezident Sadir Japarov «Kabar» agentligiga bergan intervyusida Kampirobod boʻyicha mitinglar ortida kimlar turgani haqida hukumat ma'lumotga ega ekanini aytgandi.

23 oktyabr kuni ommaviy hibsga olishlar boshlandi. Ommaviy tartibsizliklar uyushtirishga urinishda gumonlanib, 20 dan ortiq siyosatchilar, faollar va blogerlar qoʻlga olindi. Ularning uylarida tintuvlar oʻtkazilgan. 24 oktyabr kuni Bishkek sudi ularning koʻpchiligini 2 oyga hibsga oldi.

Masala tarixi
Ikki davlat oʻrtasida 2021 yil mart oyida erishilgan kelishuvlarga muvofiq, bir qator chegaraoldi uchastkalari, xususan, Ungar-Too togʻi Qirgʻizistonga oʻtadi. Ushbu hududlar evaziga Oʻzbekiston Kampirobod suv omboridan foydalanish huquqini qoʻlga kiritgan. Shahrixonsoy kanali joylashgan 50 gektarlik maydon ham Oʻzbekistonga oʻtgan. Qirgʻiziston buning evaziga Oʻzgan tumanining chegaraoldi qismidan 50 gektar er olgan.

Oʻzbekiston nashrlari bu haqda Qirgʻiziston ommaviy axborot vositalari va qoʻshni mamlakatning Milliy xavfsizlik davlat qoʻmitasi raisi Qamchibek Tashievga tayanib xabar bergan. Oʻzbekiston tomoni Qirgʻiziston bilan erishilgan kelishuvlar haqida batafsil ma'lumot bermagan.

Qirgʻizistonning Qorasuv tumani Savay qishlogʻi aholisi 2021 yil 14 aprel kuni Kampirobod suv omborining 50 gektari Oʻzbekistonga berilishiga qarshi muddatsiz norozilik aktsiyasini boshladi. Oqsoqollar hukumatning xatti-harakatlaridan, er almashish boʻyicha batafsil axborot yoʻqligidan va bunda mahalliy aholi fikri inobatga olinmaganidan noroziligini bildirgan. Aholining fikricha, bu almashinuv Qirgʻiziston manfaatlariga zarar keltiradigan koʻrinishda amalga oshirilgan. “Zamin” yangiliklarini “Telegram”da kuzatib boring